រាជរដ្ឋាភិបាល​កម្ពុជា និង​រដ្ឋាភិបាល​ចិន បាន​កំណត់​យក​ឆ្នាំ​២០២៤ ជា “​ឆ្នាំ នៃ​ការផ្លាស់ប្ដូរ​ប្រជាជន និង ប្រជាជន កម្ពុជា​-​ចិន​”

ពិធី​បើក​ជា​ផ្លូវការ “​ឆ្នាំ នៃ​ការផ្លាស់ប្ដូរ​ប្រជាជន​និង​ប្រជាជន កម្ពុជា​-​ចិន​” បាន​ប្រារព្ធ​ឡើង​នៅ​វេលា​ម៉ោង ៧​យប់ ថ្ងៃទី​១៣ ខែ​មករា ឆ្នាំ​២០២៤ នៅ​បរិវេណ​ព្រះ​លានជល់ដំរី ខេត្តសៀមរាប ក្រោម​អធិបតីភាព សម្តេច​ពិជ័យ​សេនា ទៀ បាញ់ ឧត្តមប្រឹក្សា​ផ្ទាល់​ព្រះមហាក្សត្រ តំណាង​ដ៏​ខ្ពង់ខ្ពស់ សម្តេច​អគ្គមហាសេនាបតី​តេជោ ហ៊ុន សែន ប្រធាន​ក្រុម​ឧត្តមប្រឹក្សា​ផ្ទាល់​ព្រះមហាក្សត្រនៃ​ព្រះរាជាណាចក្រ​កម្ពុជា និង ឯកឧត្តម លី ស៊ូ​ឡី សមាជិក​ការិយាល័យ​នយោបាយ និង​ជា​រដ្ឋមន្ត្រី​ក្រសួង​ឃោសនាការ​នៃ​គណៈកម្មាធិការ​មជ្ឈិមបក្ស​ក​ម្មុយ​នីស្ត​ចិន​។​
​តាមរយៈ​គំនិត​ផ្តួចផ្តើម​ដ៏​ខ្ពង់ខ្ពស់​របស់ សម្តេច​មហា​បវរ​ធិបតី ហ៊ុន ម៉ា​ណែ​ត នាយករដ្ឋមន្ត្រី នៃ​ព្រះរាជាណាចក្រ​កម្ពុជា ក្នុងជំនួប​ទ្វេភាគី​ជាមួយ ឯកឧត្តម ស៊ី ជីន​ពីង ប្រធានាធិបតី នៃ​សាធារណរដ្ឋ​ប្រជាមានិត​ចិន កាលពី​ខែ​តុលា ឆ្នាំ​២០២៣ រាជរដ្ឋាភិបាល​កម្ពុជា និង​រដ្ឋាភិបាល​នៃ​សាធារណរដ្ឋ​ប្រជាមានិត​ចិន បាន​ឯកភាព​កំណត់​យក​ឆ្នាំ​២០២៤ ជា “​ឆ្នាំ​នៃ​ការផ្លាស់ប្តូរ​ប្រជាជន និង​ប្រជាជន កម្ពុជា​-​ចិន​” ដើម្បី​លើកកម្ពស់​វិស័យ​ទេសចរណ៍ និង​ការតភ្ជាប់​រវាង​ប្រទេស​ទាំង​ពីរ ព្រមទាំង​ពង្រឹង ទំនាក់ទំនង​នៃ​ចំណង​មិត្តភាព​ត្បូង​ពេជ្រ ។​

​នៅក្នុង​ឱកាស​នេះ សម្តេច​ពិជ័យ​សេនា ទៀ បាញ់ មាន​សុទិដ្ឋិនិយម​ថា ការ​កំណត់​យក​ឆ្នាំ​២០២៤ ជា “​ឆ្នាំ​នៃ​ការផ្លាស់ប្តូរ​ប្រជាជន​និង​ប្រជាជន កម្ពុជា​-​ចិន​” នឹង​ក្លាយជា​ចលករ​យ៉ាងសំខាន់​ក្នុង​ការបង្កើន​ត​ភ្ជាប់​វិស័យ​ទេសចរណ៍ វប្បធម៌ និង​ទំនាក់ទំនង​រវាង​ប្រជាជន​នៃ​ប្រជាជាតិ​ទាំងពីរ និង​ជា​មូលដ្ឋាន​មិន​អាច​ខ្វះ​បាន ក្នុង​ការសម្រេច​ឱ្យបាន​នូវ​ការកសាង​សហគមន៍​ជោគវាសនា​រួមគ្នា រវាង​ប្រជាជាតិ​យើង​ទាំង​ពីរ កម្ពុជា​-​ចិន​»​។​

​សម្តេច បាន​គូសបញ្ជាក់ថា តាមរយៈ​ការកំណត់ យក​ឆ្នាំ​២០២៤ ជា «​ឆ្នាំ​នៃ​ការផ្លាស់ប្តូរ​ប្រជាជន​និង​ប្រជាជន កម្ពុជា​-​ចិន​» នឹង​អាច​ផ្សព្វផ្សាយ​កាន់តែច្បាស់​ពី​វប្បធម៌ ប្រពៃណី សក្តានុពល​ទេសចរណ៍ និង​ទំនាក់ទំនង​រវាង​ប្រជាជន​នៃ​ប្រទេស​ទាំង​ពីរ ដែល​មិន​ត្រឹមតែ​ចូលរួម​ដល់​ការពង្រឹង​ចំណងមិត្តភាព និង​កិច្ចសហប្រតិបត្តិការ​ល្អ ការបង្កើន​ទំនាក់ទំនង​លើ​វិស័យ​ទេសចរណ៍ និង​ពាណិជ្ជកម្ម និង​ការផ្លាស់ប្តូរ​វប្បធម៌​គ្នា​ទៅវិញទៅមក​រវាង​កម្ពុ​ជា​-​ចិន​ប៉ុណ្ណោះ​ទេ ប៉ុន្តែ​ព្រឹត្តិការណ៍​នេះ​បង្ហាញ​ពី​ការយកចិត្តទុកដាក់​ជា​អាទិភាព​យ៉ាងសំខាន់ លើ​ប្រភព​ទីផ្សារ​ចិន​សម្រាប់​វិស័យ​ទេសចរណ៍​កម្ពុជា​ផង​ដែរ​។​

​ពិធី​បើក «​ឆ្នាំ​នៃ​ការផ្លាស់ប្តូរ​ប្រជាជន​និង​ប្រជាជន កម្ពុជា​-​ចិន ២០២៤» នេះ បាន​ឆ្លុះបញ្ចាំង​ឱ្យឃើញថា វិស័យ​ទេសចរណ៍ និង​វប្បធម៌​មាន​ទំនាក់ទំនង​គ្នា​យ៉ាង​ស្អិតរ​មួ​ត​ប្រៀប​បាន​សរសៃអំបោះ​ដែល​វេញ​ចូលគ្នា បាន​រួមចំណែក​យ៉ាង​សំខាន់​ក្នុង​ការពង្រឹង​នូវ​ភាព​ទាក់ទាញ និង​ភាព​ប្រកួតប្រជែង សម្រាប់​តំបន់​ទេសចរណ៍ ក៏ដូចជា​សម្រាប់​ប្រទេសជាតិ​។​

​វិស័យ​វប្បធម៌​បាន​ដើរតួនាទី​ជា​ឧបករណ៍​ដ៏​មាន ប្រសិទ្ធភាព សម្រាប់​អភិវឌ្ឍ​ផលិតផល​ទេសចរណ៍​។ ជាមួយគ្នានេះ វិស័យ​ទេសចរណ៍​បាន​បង្កើត​នូវ​ប្រភព​ចំណូល និង​ធនធាន ដែល​អាច​គាំទ្រ និង​ពង្រឹង​ការអភិរក្ស និង​អភិវឌ្ឍ​វប្បធម៌​ក្នុង​យុគសម័យ​នៃ​ភាព​ច្នៃប្រឌិត និង​សាកលភាវូបនីយកម្ម​។ ទេសចរណ៍ និង​វប្បធម៌ មាន​ភាព​ផ្សារភ្ជាប់​គ្នា​តាមរយៈ​សក្កា​នុព​ល​នៃ​កំណើន​វិស័យ​ទាំង​ពីរ​ផង​ដែរ ក្នុងនោះ​ទេសចរណ៍វប្បធម៌ គឺជា​ទីផ្សារ​ទេសចរណ៍​ពិភពលោក​ដែល​មាន​ទំហំ​ធំ​ជាងគេ និង​មាន​ការកើនឡើង​ខ្លាំងជាងគេ ហើយ​វប្បធម៌ និង​ឧស្សាហកម្ម​សិល្បៈ​ច្នៃប្រឌិត ត្រូវ​បាន​កំពុង​ប្រើប្រាស់​កាន់តែ​ខ្លាំង​ឡើង​ដើម្បី​ផ្សព្វផ្សាយ​ពី​គោលដៅ​ទេសចរណ៍​នីមួយៗ​។

​ការប្រើប្រាស់ និង​ការច្នៃប្រឌិត​វប្បធម៌​ដើម្បី​បង្កើន​ភាព​ទាក់ទាញ​នៃ​ទីផ្សារ​ទេសចរណ៍ បាន​ជំរុញ​ឱ្យ​មាន​ភាពសម្បូរ​បែប​នៃ​អត្តសញ្ញាណ​ក្នុង​តំបន់ និង​លើកស្ទួយ​រូបភាព​នៃ​គោលដៅ​ទេសចរណ៍​។ កម្ពុជា​-​ចិន បាន​ភ្ជាប់​ទំនាក់ទំនង​នៅ​ថ្ងៃ​ទី​១៩ ខែកក្កដា ឆ្នាំ​១៩៥៨ ដែល​រហូត​មកដល់ពេលនេះ ប្រទេស​ទាំង​ពីរ បាន​ក្លាយទៅជា​ដៃគូ​យុទ្ធសាស្ត្រ​គ្រប់​ជ្រុងជ្រោយ និង​កំពុង​កសាង​សហគមន៍​រួម​វាសនា​តែមួយ ។​

​ពិធី​បើក “​ឆ្នាំ​នៃ​ការផ្លាស់ប្តូរ​ប្រជាជន​និង​ប្រជាជន កម្ពុជា​-​ចិន ២០២៤” មាន​ការសម្តែង​ទស្សនីយភាព​សិល្បៈ​រួមគ្នា ការ​បញ្ចាំង​វីដេអូ មិត្តភាព​កម្ពុជា​-​ចិន រួម​ជាមួយ​ការ ទូង​ស្គរ ប្រកាស​បើក​ជា​ផ្លូវការ “​ឆ្នាំ​នៃ​ការផ្លាស់ប្តូរ​ប្រជាជន​និង​ប្រជាជន កម្ពុជា​-​ចិន ២០២៤” ដោយ​មាន​ការអញ្ជើញ​ចូលរួម​ពី​ថ្នាក់ដឹកនាំ អ្នកសារព័ត៌មាន​ជាតិ​-​អន្តរជាតិ ក្រុម​សិល្បៈ តារា​ល្បីៗ វិនិយោគិន ភ្ញៀវទេសចរ កម្ពុជា​-​ចិន សរុប​ជាង ១០០០​នាក់​។​

​ព្រឹត្តិការណ៍​ដ៏​ធំ​នេះ ក៏​មាន​ការផ្សាយ​ផ្ទាល់​ពិសេស​ដោយ ទូរទស្សន៍​ជាតិ​កម្ពុជា ទទ​ក រួម​ទាំង​មាន​ការផ្សាយ​បន្ត​ផ្ទាល់​នៅលើ​បណ្តាញ​ទូរទស្សន៍​នៅ​កម្ពុជា ព្រមទាំង​ប្រព័ន្ធ​ផ្សព្វផ្សាយ​នានា នៃ​ប្រទេស​ចិន ៕​