ឯកឧត្តម ទេសរដ្ឋមន្ត្រី លី ធុជ ដឹកនាំគណៈប្រតិភូនៃស្ថានទូតបណ្តាសមាជិកអាស៊ានប្រចាំកម្ពុជា ចុះទស្សនកិច្ចសកម្មភាពបោសសម្អាតមីននៅស្រុកអន្លង់វែង ខេត្តឧត្តរមានជ័យ
ថ្ងៃទី០៥ ខែមេសា ឆ្នាំ២០២៤ តាងនាម សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងជាប្រធានអាជ្ញាធរមីន ឯកឧត្តមបណ្ឌិត លី ធុជ ទេសរដ្ឋមន្ត្រី និងជាអនុប្រធានទី១ អាជ្ញាធរមីន បានដឹកនាំគណៈប្រតិភូនៃស្ថានទូតបណ្តាសមាជិកអាស៊ានប្រចាំកម្ពុជាទាំងអស់ ចុះពិនិត្យសកម្មភាពបោសសម្អាតមីនរបស់អង្គការ Halo Trust នៅឃុំអន្លង់វែង ស្រុកអន្លង់វែង ខេត្តឧត្តរមានជ័យ ក្នុងនោះក៏មានការអញ្ជើញចូលរួមផងដែរពីតំណាងស្ថានទូតជប៉ុនប្រចាំកម្ពុជា និងក្រុមហ៊ុន Prince Holding Group ។
ដំណើរទស្សនកិច្ចស្វែងយល់នេះ រៀបចំឡើងមជ្ឈមណ្ឌលតំបន់អាស៊ានសម្រាប់សកម្មភាពមីន (ARMAC) ដឹកនាំដោយ ឯកឧត្តម Buakeo Phumvongsay ឯកអគ្គរដ្ឋទូតឡាវប្រចាំកម្ពុជា និងជាប្រធានគណៈកម្មាធិការដឹកនាំនៃមជ្ឈមណ្ឌល ARMAC និងលោកស្រី ប៊ុត រតនា នាយិកាប្រតិបត្តិ ARMAC ។
ក្នុងឱកាសនោះ ឯកឧត្តមទេសរដ្ឋមន្ត្រី លី ធុជ បានវាយតម្លៃខ្ពស់ចំពោះតួនាទី និងភារកិច្ចរបស់មជ្ឈមណ្ឌលតំបន់អាស៊ានសម្រាប់សកម្មភាពមីន(ARMAC) ក្នុងការដឹកនាំ និងសម្របសម្រួលវិស័យសកម្មភាពមីនថ្នាក់តំបន់អាស៊ានកន្លងមក ដែលមជ្ឈមណ្ឌលនេះ ត្រូវបានបង្កើតឡើងក្រោមគំនិតផ្តួចផ្តើមរបស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី ហើយបច្ចុប្បន្នសម្តេចតេជោ ត្រូវបានជ្រើសរើសជាប្រធានព្រឹទ្ធសភា នៃព្រះរាជាណាចក្រកម្ពុជា។ គំនិតផ្តួចផ្តើមរបស់សម្តេចតេជោ ត្រូវបានទទួលការអបអរសាទរ និងគាំទ្រពីបណ្តាប្រមុខរដ្ឋ និងប្រមុខរដ្ឋាភិបាលនៃប្រទេសអាស៊ានទាំងអស់ កាលពីអំឡុងពេលកម្ពុជា ធ្វើជាប្រធានអាស៊ានឆ្នាំ២០១២។
ជាមួយគ្នានេះ ឯកឧត្តមទេសរដ្ឋមន្ត្រី បានលើកឡើងអំពីគោលនយោបាយការទូតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការបន្តពង្រឹងចំណងមិត្តភាពជាមួយប្រទេសក្នុងតំបន់អាស៊ាន ដោយពង្រីកនូវកិច្ចសហប្រតិបត្តិការលើគ្រប់វិស័យ និងភាពជាដៃគូយុទ្ធសាស្ត្រគ្រប់ជ្រុងជ្រោយ ដើម្បីឱ្យអាស៊ានសម្រេចបាននូវគោលដៅ “សហគមន៍រួម វាសនារួម” និងដើម្បីផលប្រយោជន៍រវាងប្រទេសជាតិនិងប្រទេសជាតិ ប្រជាជននិងប្រជាជន។
ឯកឧត្តមទេសរដ្ឋមន្ត្រី ក៏បានលើកឡើងគោលនយោបាយ និងផែនការយុទ្ធសាស្ត្ររបស់រាជរដ្ឋាភិបាលកម្ពុជាអាណត្តិទី៧ ក្នុងការដោះស្រាយបញ្ហាមីន និងសំណល់ជាតិផ្ទុះពីសង្គ្រាមទាំងថ្នាក់ជាតិ ថ្នាក់តំបន់ និងពិភពលោក តាមរយៈការចូលរួមផ្តល់នូវកិច្ចសហប្រតិបត្តិការ ការបណ្តុះបណ្តាលបច្ចេកទេស និងមន្ត្រីជំនាញ ជាដើម។
ជាចុងក្រោយ ឯកឧត្តមទេសរដ្ឋមន្ត្រី លី ធុជ បានថ្លែងអំណរគុណយ៉ាងជ្រាលជ្រៅចំពោះកិច្ចសហការរៀបចំរបស់អង្គការ Halo Trust ព្រមទាំងបានវាយតម្លៃខ្ពស់ចំពោះកិច្ចខិតខំប្រឹងប្រែង និងសមិទ្ធផលសម្រេចបានរបស់អង្គការ Halo Trust ដែលបានចូលរួមបោសសម្អាតមីនមនុស្សធម៌នៅកម្ពុជា ចាប់តាំងពីឆ្នាំ១៩៩១ ហើយបានចាត់ទុកអង្គការ Halo Trust ជាដៃគូយ៉ាងរឹងមាំឆ្ពោះទៅរកកម្ពុជាមួយដែលគ្មានមីននាពេលដ៏ខ្លីខខាងមុខ៕
