ពលរដ្ឋស្នើសុំឯកឧត្តម ញ៉ែម សំអឿន អភិបាលនៃគណៈអភិបាលខេត្ត និងលោក ផុន ខែមរិន្ទ ប្រធានមន្ទីរបរិស្ថានខេត្តរតនគិរី ជួយទបស្កាត់ផងជនជាតិវៀតណាម ជាច្រើនអ្នកប្រដាប់ដោយរណារយន្តគ្រប់ដៃកំពុងចូលកាត់រំលំដើមសម្រងព្រៃយកផ្លែនៅតំបន់”អូរចាដង់យ៉លរហូតដល់កន្ទុយនាគ”
ខេត្តរតនគិរី៖ តាមសេចក្តីរាយការណ៍ពីក្រុមប្រជាពលរដ្ឋបានឱ្យដឹងថា ថ្មីៗនេះត្រូវគេឃើញមានជនជាតិវៀតណាម ជាច្រើនអ្នកបានសម្រុកចូលទឹកដីខ្មែរ ដោយខុសច្បាប់ តាមច្រករបៀងមួយចំនួនតាមក្រវ៉ាត់ព្រំដែន ក្នុងភូមិសាស្ត្រទឹកដីស្រុក តាវែង និងស្រុកអណ្តូងមាស ដើម្បីចូលមករំលំដើមសម្រងព្រៃទាំងនេះទាំងយប់ទាំងថ្ងៃ ដើម្បីយកផ្លែជញ្ជូនយកទៅប្រទេសវៀតណាម។
សេចក្តីរាយការណ៍បានបញ្ជាក់ទៀតថា ការចូលកាប់ដើមសម្រងព្រៃយកផ្លែនេះ ដោយមានការបើដៃពីមន្ត្រីបរិស្ថាន ស្រុកតាវែង និងស្រុកអណ្តូងមាស ផ្នែកខ្លះប្រជាជនខ្មែរ ជាអ្នកកាប់រំលំ និងកន្លែងខ្លះទៀត ជាជនជាតិវៀតណាម ។ មិនតែប៉ុណ្ណោះជនជាតិវៀតណាម ដែលចូលមកកាត់ដើមសម្រងព្រៃទាំងនោះ គេបានប្រមូលទិញផ្លែសម្រងព្រៃទាំងផ្លែចាស់ និងខ្ចី។
ទាក់ទិនករណីជនជាតិវៀតណាមចូលទៅអាររំលំដើមសម្រងព្រៃយ៉ាងអនាធិតេយ្យនៅតំបន់ភូមិសាស្ត្រ(អូរចាដង់យ៉ល រហូតដល់ចំណុចកន្ទុយនាគ)ខាងលើនេះ ពេលនេះសមត្ថកិច្ចបរិស្ថានដែលនៅឈរជើង នៅតំបន់ស្រុកតាវែង និងនៅតំបន់ភូមិចងទឹកដីស្រុកអណ្តូងមាស កម្លាំងសមត្ថកិច្ចទាំងនោះ បានយាមកាមយ៉ាងតឹងរឹងហាមមិនអោយប្រជាជនមួយចំនួនចូលទៅរើសផ្លែសម្រងព្រៃទាំងនេះឡើយ។
ជាក់ស្តែង នៅដើមខែ មេសា ឆ្នាំ២០២៤នេះ ករណីជនជាតិវៀតណាម ចូលមកកាប់ដើមសម្រងខាងលើនេះ គឺប្រដាប់ដោយរណារយន្តគ្រប់ដៃ សូមជម្រាបថា រណាយន្តទាំងនោះមិនសូវលាន់ឮសម្លេងខ្លាំងនោះទេ តែដើមសម្រងព្រៃនៅណុចទីតាំងខាងលើ បានដួលរលំយ៉ាងរំគាល។
យ៉ាងណាក៍ដោយ ករណីជនជាតិវៀតណាមលួចឆ្លងដែនចូលទឹកដីខ្មែរ តាមច្រករបៀងដោយខុសច្បាប់នេះ ពលរដ្ឋស្នើរសុំដល់ឯកឧត្តម ញ៉ែម សំអឿន អភិបាលខេត្តរតនគិរី និងលោក ផុន ខែមរិន្ទ ប្រធានមន្ទីរបរិស្ថានខេត្តរតនគិរី សូមលោកទាំងពីរមេត្តាមានចំណាត់ការជួយទប់ស្កាត់ជនជាតិវៀតណាមដែលចូលកាប់រំលំដើមសម្រងព្រៃនៅព្រៃការពារដោយបរិស្ថានចំណុចអូរចាដង់យ៉ល រហូតដល់កន្ទុយនាគ បើពុំដូចច្នេះទេ ព្រៃឈើនិងផ្លែឈើព្រៃដ៍មានតម្លៃមហារសាលដ៍ជាទ្រព្យសម្បត្តិជាតិទាំងនេះ និងរលាយហិនហោចជាក់ជាពុំខាន៕
