កម្ពុជាធ្វើជាម្ចាស់ផ្ទះ ទទួលប្រតិភូសារព័ត៌មាននៃប្រទេសជាប់ទន្លេមេគង្គ-ឡានឆាង ក្នុងកម្មវិធី សង្ក្រាន្ត-សៀមរាប
នាព្រឹកថ្ងៃទី ១៤ ខែមេសា ឆ្នាំ២០២៤ តំណាងដ៏ខ្ពង់ខ្ពស់ របស់ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ឯកឧត្តម ហាស់ សំអាត អនុរដ្ឋលេខាធិការក្រសួងព័ត៌មាន និងជាប្រធានគណៈក្រុមការងារ បានអញ្ញើញជាអធិបតីភាព និងទទួលបដិសណ្ឋារកិច្ច អ្នកសារព័ត៌មានមកពីប្រទេសជាប់ទន្លេមេគ្គងរួមមាន ចិន វៀតណាម ថៃ ឡាវ និងមីយ៉ាន់ម៉ា។
ឯកឧត្តម ហាស់ សំអាត បានស្វាគមន៍យ៉ាងកក់ក្តៅចំពោះអ្នកសារព័ត៌មានទាំងអស់ ដែលបានចូលរួមក្នុងកម្មវិធី និងថ្លែងអំណរគុណចំពោះប្រទេសចិនដែលបានឧបត្ថម្ភ និងគាំទ្រលើគម្រោងនេះ។
ឯកឧត្តម ហាស់ សំអាត បានគូសបញ្ជាក់ពីភាពជោគជ័យរបស់ក្រសួងព័ត៌មាន ក្នុងការទទួលបដិសណ្ឋារកិច្ចអ្នកសារព័ត៌មានអាស៊ាន ក្នុងកម្មវិធីអង្គរសង្ក្រាន្តកាលពីឆ្នាំ ២០១៨ ដោយអ្នកសារព័ត៌មានមកពីបណ្តាលប្រទេសអាស៊ាន បានបង្ហាញនូវចំណាប់អារម្មណ៍ក្នុងការចូលរួមក្នុងកម្មវិធីអង្គរសង្ក្រាន្ត និងបានផ្សព្វផ្សាយតាមគ្រប់ប្រព័ន្ធផ្សព្វផ្សាយតាមប្រទេសនីមួយៗផងដែរ។
លោក លូ ឈីជី ទីប្រឹក្សាប្រចាំស្ថានទូតចិននៅកម្ពុជា តំណាងស្ថានទូកចិននៅកម្ពុជា បានសម្តែងភាពរីករាយ និងស្វាគមន៍ ដល់ដំណើរទស្សន:កិច្ចរបស់អ្នកសារព័ត៌មានមកពីប្រទេស ជាប់ដងទន្លេរមេគង្គទាំងអស់ និងបញ្ជាក់ថា កម្មវិធីនេះធ្វើឡើងមិនត្រឹមតែសម្រាប់ចូលរួមអបអរសាទរឆ្នាំថ្មីប៉ុណ្ណោះទេ ប៉ុន្តែកម្មវិធីនេះបង្កើតឡើងដើម្បីធ្វើការផ្សព្វផ្សាយពីវប្បធម៌ ប្រពៃណីទំនៀមទម្លាប់ ដែលមានភាពស្រដៀងគ្នាទៅហ្នឹងជនជាតិភាគតិចចំនួន ១៥៦ ជនជាតិរបស់ប្រទេសចិន ដែលបានប្រារព្វកម្មវិធីប្រភេទនេះដូចគ្នា ។
កម្មវិធីនេះបានជម្រុញទំនាក់ទំនង សាមគ្គីភាព មិត្តភាពកាន់តែជិតសិទ្ធ រវាងប្រទេសជាប់ដងទន្លេមេគង្គ។
ឆ្លៀតក្នុងឱកាសនេះ លោក សំកុល សុចិត្រា អភិបាលរងខេត្តសៀមរាប និងជាអនុប្រធាន ស.ស.យ.ក ខេត្តសៀមរាបបានឱ្យដឹងថា ឆ្នាំ២០២៤នេះ ជាលើកទី៣ ហើយដែលខេត្តសៀមរាបបានរៀបចំព្រឹត្តិការណ៍សង្ក្រាន្តទ្រង់ទ្រាយធំ ។
សម្រាប់ឆ្នាំនេះ រដ្ឋបាលខេត្តសៀមរាបបានរៀបចំនូវកម្មវិធីជាច្រើនតាមទីតាំងសំខាន់ៗ ដែលកម្មវិធីដែលបានរៀបចំរួមមាន៖ ល្បែងប្រជាប្រិយ ការប្រណាំងទូក ការបង្ហោះខ្លែង ការតាំងពិព័ណ៍ ស្តង់លក់ម្ហូបគ្រប់ប្រភេទ ការប្រគុំតន្ត្រី សម្តែងសិល្ប: និងកម្មវិធីជាច្រើនទៀត។
លោក សំកុល សុចិត្រា បានស្វាគមន៍ អ្នកសារព័ត៌មានទាំងអស់ ដែលបានចូលរួមក្នុងកម្មវិធីសង្ក្រាន្តឆ្នាំនេះ និងសង្ឃឹមថា បន្ទាប់ពីត្រលប់ទៅវិញ អ្នកសារព័ត៌មាននឹងធ្វើការផ្សព្វផ្សាយពីប្រទេសកម្ពុជាឱ្យបានកាន់តែទូលំទូលាយ។ ជាពិសេសកម្មវិធីនេះ ធ្វើឡើងដើម្បីបង្កើតទំនាក់ទំនង សាមគ្គីភាព រវាងប្រទេសជាប់ទន្លេរមេគង្គ “មេគង្គ-ឡានឆាង”៕
