ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និង ឯកឧត្តម ខៀវ កាញារីទ្ធ សមាជិករដ្ឋសភា អញ្ជើញចូលរួមជាកិត្តិយសក្នុងពិធីបុណ្យបញ្ចុះសព ឯកឧត្តម លី វ៉ាន់ហុង អគ្គនាយករដ្ឋបាល និងហិរញ្ញវត្ថុនៃក្រសួងព័ត៌មាន
បន្ទាប់ពីបានតម្កល់ធ្វើបុណ្យអស់រយៈពេល ៦ថ្ងៃនៅគេហដ្ឋាននៃសពស្ថិតនៅបុរីប៉េងហួតបឹងស្នោរ រួចមក សព ឯកឧត្តម លី វ៉ាន់ហុង អគ្គនាយករដ្ឋបាល និងហិរញ្ញវត្ថុនៃក្រសួងព័ត៌មាន ត្រូវបានក្រុមគ្រួសារ រៀបចំធ្វើការដង្ហែយកមកប្រារព្ធពិធីបុណ្យបញ្ចុះសព នៅបរិវេណវត្ត អង្គត្រងៀត ខណ្ឌពោធិសែនជ៏យ ស្ថិតតាមបណ្តោយផ្លូវជាតិលេខ ៣ រាជធានីភ្នំពេញ។
ពិធីបុណ្យបញ្ចុះសព ឯកឧត្តម លី វ៉ាន់ហុង អគ្គនាយករដ្ឋបាល និងហិរញ្ញវត្ថុនៃក្រសួងព័ត៌មាន បានធ្វើឡើងនៅព្រឹកថ្ងៃទី១៥ ខែកក្កដា ឆ្នាំ២០២៤ ក្រោមវត្តមានអញ្ជើញជាកិត្តិយសពី ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និង ឯកឧត្តម ខៀវ កាញារីទ្ធ សមាជិករដ្ឋសភា និងជាអតីតរដ្ឋមន្ត្រីក្រសួងព័ត៌មាន ព្រមទាំងមានការអញ្ជើញចូលរួមពីថ្នាក់ដឹកនាំ មន្ត្រីរាជការនៃក្រសួងព័ត៌មាន ក្រុមគ្រួសារ បងប្អូនដាច់ញាត្តិយ៉ាងច្រើនកុះករ។
តាមរយៈវិយោគកថាសង្ខេបអានដោយ ឯកឧត្តម កឹម គុណវឌ្ឍ រដ្ឋលេខាធិការក្រសួងព័ត៌មាន បានអោយដឹងថា កុមារ លី វ៉ាន់ហុង កើតនៅឆ្នាំ១៩៦៦ ជាកូនអាជីវករ មានដើមកំណើតនៅសង្កាត់លេខ១ ក្រុងភ្នំពេញ លោកជាកូនទី៧ ក្នុងចំណោមបងប្អូនប្រាំបីនាក់ ដែលមានឪពុកឈ្មោះ ហៃ ងួន និងម្តាយឈ្មោះ លី ហេងណៃ។
ប្រវត្តិការងារ ដើម្បីជួយទ្រទ្រង់ដល់ជីវភាព រស់នៅរបស់ក្រុមគ្រួសារក្នុងដំណាក់កាលការពារកសាងប្រទេស យុវជន លី វ៉ាន់ហុង បានចាប់យកអាជីព និងប្រកបមុខរបរជាអ្នកថតរូបមានស្នាដៃល្អ និងមានប្រជាប្រិយ៍ភាពម្នាក់ក្នុងចំណោមអ្នកអាជីពថតរូបនៅមុខព្រះបរម រាជវាំង។
លោក លី វ៉ាន់ហុង ក៏បានជ្រើសឱ្យចូលបម្រើការងាររដ្ឋនៅអង្គភាពទីភ្នាក់ងារសារព័ត៌មានខ្មែរ (SPK) ក្នុងនាយកដ្ឋានទស្សនាវដ្ដីកម្ពុជាការពារ និងកសាង ។ នៅឆ្នាំ១៩៨៥ ជាមន្ត្រីយកព័ត៌មានរូបថត និងជាអ្នកយកព័ត៌មានរូបថតប្រចាំនៅតំបន់សមរភូមិនាបន្ទាត់ព្រំដែនកម្ពុជា-ថៃ ។ ក្នុងឆ្នាំ១៩៩៧ ដោយមានស្នាដៃល្អក្នុងការងារប្រឡងប្រណាំង និងជាទីទំនុកចិត្តពីថ្នាក់ដឹកនាំ លោក លី វ៉ាន់ហុង ត្រូវ បានតែងតាំងជាប្រធានការិយាល័យរោងពុម្ព នៃទីភ្នាក់ងារសារព៌ត័មានកម្ពុជា (AKP) ក្រោយមកបានប្តូរ ជាអគ្គនាយកដ្ឋានទីភ្នាក់ងារសារព័ត៌មានកម្ពុជា (AKP)។ នៅឆ្នាំ២០០២ លោក ក៏ត្រូវបានតែងតាំងជា អនុប្រធាននាយកដ្ឋានរោងពុម្ភ នៃអគ្គនាយកដ្ឋានទីភ្នាក់ងារសារព័ត៌មានកម្ពុជា (AKP) ។ ក្នុងការកសាងសមត្ថភាពចំណេះដឹងដោយរៀនផង ធ្វើការផង នៅឆ្នាំ២០០៨ លោក លី វ៉ាន់ហុង បន្តការសិក្សាទទួលបានសញ្ញាបត្របរិញ្ញាបត្រជាន់ខ្ពស់ពីសាកលវិទ្យាល័យ ចំរើនពហុបច្ចេកវិទ្យា ក្នុងមុខជំនាញរដ្ឋបាលសាធារណៈ។
តាមរយៈស្នាដៃ និងសមិទ្ធផលការងារល្អនៅក្នុងឆ្នាំ២០០៤ លោក លី វ៉ាន់ហុង ត្រូវបានថ្នាក់ដឹកនាំក្រសួងព័ត៌មាន តែងតាំងជាអគ្គនាយករង នៃអគ្គនាយកដ្ឋានទីភ្នាក់សារព័ត៌មានកម្ពុជា (AKP)។ ក្នុងរយៈពេល ១៣ឆ្នាំនៃការងារល្អ និងជាមន្ត្រីមានគុណាធិបតេយ្យ តាមសំណើរបស់ សម្តេចអគ្គមហាសេនាបតី ហ៊ុន សែន អតីតនាយករដ្ឋមន្ត្រីនៃព្រះរាជាណាចក្រកម្ពុជា នៅឆ្នាំ២០១៧ ឯកឧត្តម លី វ៉ាន់ហុង បានទទួល ព្រះរាជក្រិត្យត្រាស់បង្គាប់ពី ព្រះករុណាព្រះមហាក្សត្រ តែងតាំងជា អគ្គនាយក នៃអគ្គនាយកដ្ឋានរដ្ឋបាល និងហិរញ្ញវត្ថុ ក្រសួងព័ត៌មាន រហូតមកទល់នឹងពេលរូប ឯកឧត្តម ទទួលមរណភាព។
ក្នុងជីវិតការងាររបស់ ឯកឧត្តម លី វ៉ាន់ហុង បានរួមចំណែកដ៏ធំធេងក្នុងវិស័យរដ្ឋបាល ព៌ត័មាន និងសោតទស្សន៍ របស់ក្រសួងព័ត៌មាន។ ឯកឧត្តម នៅបានបំពេញការងារបំរើរាជរដ្ឋាភិបាល បំរើគណបក្សប្រជាជនកម្ពុជា ដោយបានចុះបំពេញការងាររាជរដ្ឋាភិបាល និងការងារគណបក្សនៅក្នុង ភូមិសាស្ត្រខេត្តបាត់ដំបង ខេត្តកំពង់ចាម និងខេត្តក្រចេះ ឯកឧត្តម ជាថ្នាក់ដឹកនាំមួយរូបតែងតែមាន ព្រហ្មវិហារធម៌ ជាទីគោរព និងទទួលការកោតសរសើរពីសហភាតរ:ជាមន្ត្រីក្រោមឱវាទ។
មរណ:ភាពរបស់ ឯកឧត្តម លី វ៉ាន់ហុង គឺជាការបាត់បង់ថ្នាក់ដឹកនាំដ៏ល្អមួយរូបពីលោកយើង នេះនិងក៏ជាការបាត់បង់សហការីដ៏វិសេសវិសាលម្នាក់របស់ក្រសួងព័ត៌មាន ។
នៅក្នុងឱកាសដ៏ក្រៀមក្រំនេះ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានធ្វើសារលិខិតចូលរួមរំលែកមរណទុក្ខជូនចំពោះ ក្មួយស្រី លី ណាវិន ត្រូវជាកូននៃសព ឯកឧត្តម លី វ៉ាន់ហុង អគ្គនាយករដ្ឋបាល និងហិរញ្ញវត្ថុ នៃក្រសួងព័ត៌មាន ព្រមទាំងក្រុមគ្រួសារ ដោយក្នុងសារលិខិតបានគូសបញ្ជាក់ថា ជំនួសមុខឱ្យថ្នាក់ដឹកនាំនិងមន្ត្រីរាជការនៃក្រសួងព័ត៌មាន មានសេចក្ដីក្ដុកក្ដួល និងសោកស្តាយ ឥតឧបមា ដោយបានទទួលដំណឹងយ៉ាងក្រៀមក្រំបំផុតចំពោះមរណភាពរបស់ ឯកឧត្តម លី វ៉ាន់ហុង អគ្គនាយករដ្ឋបាល និងហិរញ្ញវត្ថុ នៃក្រសួងព័ត៌មាន ត្រូវជាឪពុករបស់ក្មួយស្រី ដែល បានទទួលមរណភាព នៅថ្ងៃពុធ ៥កើត ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១០ ខែកក្កដា ឆ្នាំ២០២៤ វេលាម៉ោង ១១:៣០ នាទីព្រឹក ក្នុងជន្មាយុ ៥៩ឆ្នាំ ដោយរោគាពាធ។
យើងទាំងអស់គ្នា សូមសម្តែងនូវការសោកស្តាយ ស្រណោះអាឡោះអាល័យ ចំពោះការបាត់បង់ឪពុក និងសមាជិកគ្រួសារជាទីគោរពស្រឡាញ់ប្រកបដោយព្រហ្មវិហារធម៌ និងមនោសញ្ចេតនាដ៏ជ្រាលជ្រៅចំពោះ ក្មួយស្រី និងក្រុមគ្រួសារ។ ការបាត់បង់ ឯកឧត្តម លី វ៉ាន់ហុង គឺជាការបាត់បង់ថ្នាក់ដឹកនាំ ១រូប ដែលបានខិតខំប្រឹងប្រែងយកអស់កម្លាំងកាយ និងកម្លាំងចិត្ត ប្រកបដោយស្មារតីទទួលខុសត្រូវ ដើម្បីចូលរួមចំណែក យ៉ាងសកម្ម ក្នុងបុព្វហេតុការងាររបស់ក្រសួងព័ត៌មាន។
ជាថ្មីម្តងទៀត យើងទាំងអស់គ្នាជាថ្នាក់ដឹកនាំ មន្ត្រីរាជការក្រសួងព័ត៌មាន សូមចូលរួមរំលែកមរណទុក្ខជាមួយ ក្មួយស្រី លី ណាវិន ព្រមទាំងក្រុមគ្រួសារ និងសូមឧទ្ទិសបួងសួងជូនដល់វិញ្ញាណក្ខន្ធរបស់សព ឯកឧត្តម លី វ៉ាន់ហុង សូមបានចាប់បដិសន្ធិ និង សោយសុខក្នុងសុគតិភព កុំបីឃ្លៀងឃ្លាតឡើយ។
តមកនៅរសៀលថ្ងៃដដែលនេះដែរ ឯកឧត្តម លោកជំទាវ ជាថ្នាក់ដឹកនាំ អស់លោក លោកស្រី ជាមន្ត្រីរាជការ តាមបណ្តាអគ្គនាយកដ្ឋាន អង្គភាពចំណុះអោយក្រសួងព័ត៌មាន បានអញ្ជើញដាក់កម្រងផ្កា និងគោរពវិញ្ញាណក្ខន្ធសព ឯកឧត្តម លី វ៉ាន់ហុង អគ្គនាយករដ្ឋបាល និងហិរញ្ញវត្ថុ នៃក្រសួងព័ត៌មាន ដែលបានទទួលមរណភាពគួរអោយសោកស្តាយ និងអាឡោះអាឡៃបំផុត៕
