ពិធីកម្ទេចឧបករណ៍ល្បែងខុសច្បាប់ បានបង្ហាញអំពីប្រសិទ្ធភាព នៃការអនុវត្តច្បាប់ និងលិខិតបទដ្ឋានគតិយុត្តពាក់ព័ន្ធក្នុងវិស័យល្បែងពាណិជ្ជកម្ម
ខេត្តព្រះសីហនុ៖ លោក រស់ ភីរុណ អគ្គលេខាធិការគណៈកម្មការគ្រប់គ្រងល្បែងពាណិជ្ជកម្ម និងលោក នៃ គង់ អភិបាលរង ខេត្តព្រះសីហនុ នៅថ្ងៃទី២៧ ខែសីហា ឆ្នាំ២០២៤ បានអញ្ជើញជាអធិបតី ក្នុងពិធីកម្ទេចឧបករណ៍ល្បែងខុសច្បាប់ ដោយមានការចូលរួមពី លោក លោកស្រី ប្រធានអនុប្រធានមន្ទីរអង្គភាពកងកម្លាំងសមត្ថកិច្ចម្ចាស់អាជីវកម្មនានា។
លោក រស់ ភីរុណ អគ្គលេខាធិការគណៈកម្មការគ្រប់គ្រងល្បែងពាណិជ្ជកម្ម បានមានប្រសាសន៍ថា ការកម្ទេចឧបករណ៍ល្បែងខុសច្បាប់នាពេលនេះ ដោយមានគោលបំណងបង្ហាញអំពីប្រសិទ្ធភាព នៃការអនុវត្តច្បាប់ និងលិខិតបទដ្ឋានគតិយុត្តពាក់ព័ន្ធក្នុងវិស័យល្បែងពាណិជ្ជកម្ម និងការអនុវត្តក្របខ័ណ្ឌការងារពាក់ព័ន្ធនឹងការគ្រប់គ្រងត្រួតពិនិត្យលើឧបករណ៍ឬកម្មវិធីល្បែងដែលជាសមត្ថកិច្ចរបស់គណៈកម្មការគ្រប់គ្រងពាណិជ្ជកម្មកម្ពុជា ដែលហៅកាត់ថា(គ.ល.ក.) ត្រូវបានបង្កើតឡើង តាមរយៈច្បាប់ស្តីពីការគ្រប់គ្រងល្បែងពាណិជ្ជកម្មមានសមាសភាពចំនួន ១១រូប មកពីក្រសួង-ស្ថាប័ន ចំនួន ៧ដែលមានសមត្ថកិច្ចពាក់ព័ន្ធ នឹងវិស័យល្បែងពាណិជ្ជកម្មដោយផ្ទាល់។
លោកក៏បានបន្ថែមថា ដោយយោងតាមមាត្រា ៣៥ នៃច្បាប់ស្តីពីការគ្រប់គ្រងល្បែងពាណិជ្ជកម្ម បានបញ្ញត្តិថា”នីតិបុគ្គលអាចប្រតិបត្តិការល្បែងពាណិជ្ជកម្មបាន លុះត្រាតែមានអាជ្ញាបណ្ណជាមុន ចំពោះ ឧបករណ៍ ឬកម្មវិធីល្បែងដែលអាចស្នើសុំចុះបញ្ជី និងអាចដាក់ឱ្យដំណើរការនៅក្នុងកាស៊ីណូបានលុះត្រាតែការផលិតការដំឡើង ការនាំចូល ការលក់ និងចែកចាយដោយក្រុមហ៊ុនដែលមានអាជ្ញាបណ្ណពី(គ.ល.ក) ដូចនេះហើយឧបករណ៍ល្បែងដែលដំណើរការដោយមិនមានការអនុញ្ញាតពី(គ.ល.ក)ត្រូវបានចាត់ទុកថាជាឧបករណ៍ល្បែងខុសច្បាប់ដែលជាកម្មវត្ថុ នៃការរឹបអូស និងកម្ទេចចោល។
ដោយយោងតាមដីកាសម្រេចប្រគល់វត្ថុតាងចាប់យករបស់អយ្យការអមសាលាដំបូងខេត្តព្រះសីហនុ បានសម្រេចប្រគល់វត្ថុតាងមួយចំនួន ជាឧបករណ៍មធ្យោបាយប្រព្រឹត្តបទល្មើស គឺត្រូវបំផ្លាញចោល ដូចនេះពិធីកម្ទេចឧបករណ៍ល្បែងខុសច្បាប់នាពេលនេះ គឺដើម្បីអនុវត្តអនុលោមតាមច្បាប់និងលិខិតបទដ្ឋានគតិយុត្តជាធរមាន និងស្របតាមដីកាសម្រេចខាងលើនេះ ដែលមានសម្ភារៈ និងឧបករណ៍ល្បែងខុសច្បាប់ ត្រូវបានកម្ទេចចោល រួមមាន៖
ម៉ាស៊ីនល្បែង ចំនួន ២៦គ្រឿងជើងកាមេរ៉ា ចំនួន ៣គ្រឿង និង ក្បាល DVR ចំនួន ៨គ្រឿង ។
លោកបញ្ជាក់ជូនផងដែរថា ការធ្វើអាជីវកម្មល្បែងដោយគ្មានអាជ្ញាបណ្ណពី(គ.ល.ក)គឺជាបទល្មើសដែលត្រូវអនុវត្តនីតិវិធីអនុលោមតាមច្បាប់ស្តីពីការបង្ក្រាបល្បែងស៊ីសង ដែលទាមទារឱ្យមានការចូលរួមសហការយ៉ាងពេញទំហឹងរបស់អាជ្ញាធរមានសមត្ថកិច្ចពាក់ព័ន្ធ ដើម្បីស្រាវជ្រាវតាមដាន និងចាត់វិធានការក្នុងការគ្រប់គ្រងអាជីវកម្មល្បែងស៊ីសងខុសច្បាប់ ឱ្យកាន់តែមានប្រសិទ្ធភាព និងស័ក្ដិសិទ្ធិភាព ដោយធ្វើយ៉ាងណាទប់ស្កាត់ និងឈានដល់លុបបំបាត់ឱ្យបាននូវសកម្មភាពលួចលាក់ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រុមប្រតិបត្តិការចម្រុះ,អាជ្ញាធរដែនដី, មន្ត្រីនគរបាលយុត្តិធម៌ រួមទាំងស្ថាប័នតុលាការ និងស្ថាប័នអនុវត្តច្បាប់ពាក់ព័ន្ធផ្សេងៗទៀត។
លោក នៃ គង់ អភិបាលរងខេត្ត បានមានប្រសាសន៍ថា តាងនាមឱ្យរដ្ឋបាលខេត្តព្រះសីហនុ ដោយនៅពេលកន្លងមកប្រតិបត្តិការបង្ក្រាបទីតាំងកាស៊ីណូអន្តរជាតិតោពីរ ដែលធ្វើអាជីវកម្មកាស៊ីណូដោយគ្មានអាជ្ញាបណ្ណដែលត្រូវបានដកហូតមកកម្ទេចចោលនាពេលនេះ ហើយសូមបញ្ជាក់ផងដែរថាអំពីការងារសន្តិសុខ សណ្ដាប់ធ្នាប់សាធារណៈ និងការចុះប្រតិបត្តិការបង្ក្រាបបទល្មើសល្បែងអនឡាញខុសច្បាប់ និងបទល្មើសឆបោកតាមប្រព័ន្ធអនឡាញ (Scammed Online) ព្រមទាំងល្បែងស៊ីសងខុសច្បាប់នៅក្នុងខេត្តព្រះសីហនុ ក្នុងនាមគណៈបញ្ជាការឯកភាពរដ្ឋបាលខេត្តព្រះសីហនុ ដោយមានកងកម្លាំងប្រដាប់អាវុធគ្រប់ប្រភេទជាសេនាធិការ និងអាជ្ញាធរដែនដីគ្រប់លំដាប់ថ្នាក់បានអនុវត្តយ៉ាងសកម្មប្រកបដោយស្មារតីទទួលខុសត្រូវខ្ពស់ចំពោះគោលនយោបាយ និងគោលការណ៍នានារបស់រាជរដ្ឋាភិបាលចូលរួមថែរក្សា ការពារបានយ៉ាងរឹងមាំនូវសន្តិភាព អធិបតេយ្យជាតិ បូរណភាពទឹកដី ស្ថិរភាពនយោបាយ សន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ជំរុញជាប់ជាប្រចាំនូវការអនុវត្តគោលនយោបាយ «ភូមិ-ឃុំ-សង្កាត់មានសុវត្ថិភាព»៕