ឈ្មួញឈើចាស់វស្សាម្នាក់នៅខេត្តក្រចេះ ឈ្មោះ ធី កាប៉ូ ដែលគេដឹកឈើបម្រុងឆ្លងដែនទៅលក់នៅប្រទេសវៀតណាមត្រូវបានក្រឡាប់រថយន្តដឹកឈើទាំងកណ្តាលអាធ្រាត្រចេញសុទ្ធតែឈើប្រណិតខុសច្បាប់
ខេត្តក្រចេះ៖ ឈ្មួញឈើឈ្មោះ ធី កាប៉ូ ដែលគេដឹងថា បានប្រើប្រាស់រថយន្តសេរីទំនើបជាច្រើនគ្រឿង ដើម្បីដឹកឈើទៅលក់ឲ្យជនជាតិវៀតណាម នៅទឹកដីប្រទេសវៀតណាម នៅពាក់កណ្តាលអាធ្រាត្រ វេលាម៉ោង១១ និង ៤០នាទីយប់ ថ្ងៃទី០៣ ខែកញ្ញា ឆ្នាំ២០២៤នេះ បានក្រឡាប់រថយន្តដឹកឈើខុសច្បាប់ នៅចន្លោះបង្គោលគីឡូម៉ែត្រលេខ៤២៣ និង ៤២៤ ស្ថិតនៅក្នុងភូមិអូរកណ្តៀរ ឃុំអូរកណ្តៀរសែនជ័យ ស្រុកអូរគ្រៀងសែនជ័យ ខេត្តក្រចេះ។
តាមសេចក្តីរាយការណ៍បានឱ្យដឹងថា នៅក្នុងហេតុការណ៍ក្រឡាប់រថយន្តដឹកឈើ ១គ្រឿងនោះ ក្រុមឈ្មួញទាំងនេះបានប្រញាប់ប្រញាល់យករថយន្តផ្សេងទៀត មកដឹកជនរងគ្រោះ និងឈើល្មើសច្បាប់ ជម្លៀសយកចេញទៅលាក់ទុកចេញពីកន្លែងកើតហេតុភ្លាមៗ នៅមុនពេលសមត្ថកិច្ចចុះទៅដល់ទីតាំងកើតហេតុ។
បើទោះជាដូចច្នេះក៍ដោយ ក៍មានអ្នកកាសែតតាមភូមិក្នុងឃុំអូរកណ្តៀរសែនជ័យ ស្រុកអូរគ្រៀងសែនជ័យ បានចុះទៅថតផ្តឹតរូបភាពពីសកម្មភាព រថយន្តដឹកឈើរបស់ឈ្មោះ ធី កាប៉ូ បានដោយសុវត្ថភាព រថយន្តដឹកឈើល្មើសច្បាប់មួយគ្រឿងនេះម៉ាកហាយឡែនឌ័រ ពណ៌ស ពាក់ស្លាកលេខ ភ្នំពេញ 2AG-7257 ។ ដែលមានផ្ទុកឈើក្នុងរថយន្តពេញ ឈើទាំនេះមានប្រភេទឈើកកោះជាច្រើនសន្លឹក និង ប្រភេទឈើដុំជាច្រើនទៀត។
តាមសេចក្តីរាយការណ៍ពីកន្លែងកើតហេតុបានអោយដឹងថា មុនពេលកើតហេតុ គេបានឃើញរថយន្តមួយគ្រឿងខាងលើនេះ បើកបោះពួយយ៉ាងលឿន នៅលើដងផ្លូវជាតិលេខ7 លុះមកដល់ចំណុចកើតហេតុខាងលើ ក៏ស្រាប់តែគេឃើញ ក្រឡាប់រមៀលធ្លាក់ពីលើទ្រូងផ្លូវជាច្រើនត្រឡប់ បានធ្វើអោយរថយន្តមួយគ្រឿងនេះផ្ងារជើងឡើងលើ ធ្លាយចេញសុទ្ធតែឈើប្រណិតគ្មានច្បាប់។
ក្រោយកើតហេតុ ឈ្មួញឈើបានជម្លៀសឈើចេញពីរថយន្តដែលកើតហេតុនោះចេញអស់ ទើបបានសមត្ថកិច្ចចុះមកដល់។ ជាក់ស្តែង នៅព្រឹកថ្ងៃទី៤ ខែកញ្ញា ឆ្នាំ២០២៤នេះ ត្រូវគេឃើញបក្ខពួកឈ្មូញឈើ បានយករថយន្តមកស្ទូចអូសយកទៅជួសជុលយ៉ាងដោយសុវត្ថភាព ដោយគ្មានការរំខាន ឬមានការពាក់ព័ន្ធដល់សមត្ថកិច្ចជំនាញនោះទេ។ បើតាមការសាកសួរ ជាព័ត៌មាន ទៅសមត្ថកិច្ច មន្ត្រីជំនាញទាំងនោះបានឆ្លើយថា ជាករណីបង្កគ្រោះថ្នាក់ដោយខ្លួនឯង ទើបមិនអាចយករថយន្តមករក្សាទុក។
ចំណែកលោកវរសេនីយ៍ លន់ ហុង អធិការនគរបាលស្រុកអូរគ្រៀងសែនជ័យបានឱ្យដឹងថា ករណីក្រឡាប់រថយន្តនេះ បានកើតឡើងនៅពេលយប់ ទើបសមត្ថកិច្ចមិនបានទទួលព័ត៌មាន ជាហេតុធ្វើឱ្យក្រុមឈ្មួញមានឱកាសយកឈើ ជម្លៀសដាក់រថយន្តផ្សេងទៀតដឹកចេញពីកន្លែងកើតហេតុខាងលើនេះ។ លោកថា រថយន្តកើតហេតុខាងលើនេះត្រូវឱ្យទៅម្ចាស់គេយកទៅជួសជុលវិញហើយ ព្រោះករណីនេះ ពួកគេបានបង្កគ្រោះថ្នាក់ដោយខ្លួនឯងប៉ុណ្ណោះ សមត្ថកិច្ចគ្មានសិទ្ធិឃាត់យកទៅរក្សាទុកនោះទេ។
យ៉ាងណាក៏ដោយពលរដ្ឋបាននិយាយថា សមត្ថកិច្ចគួរតែឃាត់រថយន្ត នឹងឈ្មួញដឹកឈើចំនួន៣នាក់ ខាងលើនេះ ដែលនៅក្នុងជាមួយរថយន្តដឹកឈើខុសច្បាប់ ម៉ាកហាយឡែនឌ័រ ពាក់ស្លាកលេខ ភ្នំពេញ 2AG- 7257 នេះ។ ទើបដឹងពីអត្តសញ្ញាណ អោយកាន់តែច្បាស់ ដើម្បីសួរនាំ និងយកទៅផ្តន្ទាទោសទៅតាមនិតិវិធីច្បាប់៕ា
