ឯកឧត្តម ឈិត សុខុន រដ្ឋមន្ត្រីក្រសួងធម្មការ និងសាសនា ក្នុងពិធីអបអរសាទរខួបលើកទី១១២ នៃទិវាអន្តរជាតិនារី ៨ មីនា ឆ្នាំ២០២៣ នៅទីស្តីការក្រសួងធម្មការ និងសាសនា
ឯកឧត្តម ឈិត សុខុន រដ្ឋមន្ត្រីក្រសួងធម្មការ និងសាសនានិងលោកជំទាវ នាព្រឹកថ្ងៃទី០២ ខែមីនា ឆ្នាំ២០២៣ អធិបតីភាព ក្នុងពិធីអបអរសាទរខួបលើកទី១១២ ទិវាអន្តរជាតិនារី ៨ មីនា ដើម្បីរួមចំណែក ជាមួយចលនាស្ត្រីក្នុងសកលលោក និងជំរុញឱ្យមានការកែប្រែផ្នត់គំនិត ឥរិយាបថអវិជ្ជមាន ដែលធ្លាប់មានចំពោះស្ត្រី រាជរដ្ឋាភិបាល បានជ្រើសយកប្រធានបទ «ស្ត្រីរួមគ្នា រក្សាសុខសន្តិភាព ដើម្បីកិច្ចអភិវឌ្ឍ ក្នុងយុគសម័យឌីជី
ថល» ក្នុងគោលបំណងបំផុស កៀរគរអ្នកពាក់ព័ន្ធឱ្យយល់ដឹងពីតម្លៃនៃការអប់រំ សម្រាប់យុវជនយុវនារី ដែលជាធនធានមនុស្សដ៏មានសក្តានុពលជួយពន្លឿនការអភិវឌ្ឍសេដ្ឋកិច្ច និងសង្គមជាតិ។
តាមរបាយការណ៍ លោកជំទាវប្រធានប្រតិបត្តិសមាគមនារីក្រសួង បានបញ្ជាក់ច្បាស់ថា ក្រសួងតែងតែយកចិត្តទុកដាក់លើកកម្ពស់តម្លៃស្ត្រី ដើម្បីឱ្យទទួលបាននូវសមភាពទៅនឹងបុរស សម្រាប់ការអភិវឌ្ឍលើគ្រប់វិស័យ ហើយបន្តជំរុញឱ្យគ្រប់អ្នកពាក់ព័ន្ធអនុវត្តវិធានការផ្នែកគោលនយោបាយ កម្មវិធីយុទ្ធនាការ និងសកម្មភាពជាក់លាក់នានា ក្នុងការលើកកម្ពស់ សមភាពយេនឌ័រ និងបង្កើតភាពអង់អាចដល់ស្ត្រី ដើម្បីការអភិវឌ្ឍប្រកបដោយចីរភាព ។ ចំពោះសមិទ្ធផលនានា ផ្នែកសេដ្ឋកិច្ច នយោបាយ និងវប្បធម៌ ដែលស្ត្រីបានរួមចំណែកកសាង និងអភិវឌ្ឍជូនសង្គមជាតិ កន្លងមក។
ឯកឧត្តម ឈិត សុខុ មានប្រសាសន៏ កោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែងរបស់ លោកជំទាវ ឯកឧត្តម អស់លោក លោកស្រី មន្ត្រីរាជការនៃសមាគមនារីក្រសួងធម្មការ និងសាសនា ដែលបានយកចិត្តទុកដាក់បំពេញកិច្ចការរបស់ខ្លួនប្រកបដោយសមត្ថភាព និងភាពទទួលខុសត្រូវខ្ពស់កន្លងមកនេះ។
ឧត្តមរដ្ឋមន្ត្រីបន្តថា ក្នុងនាមរាជរដ្ឋាភិបាល បានបន្តជំរុញ លើកកម្ពស់ការអនុវត្តគោលនយោបាយសមភាពយេនឌ័រ និងកម្មវិធីផ្សេងៗ ក្នុងការរួមចំណែកសម្រេចឱ្យបាននូវគោលដៅអភិវឌ្ឍន៍សហស្សវត្សរ៍កម្ពុជា ដូចជាការពង្រឹងសិទ្ធិស្ត្រីឱ្យទទួលបាននូវការថែទាំសុខភាព ការអភិវឌ្ឍសមត្ថភាព ការបណ្តុះ បណ្តាលវិជ្ជាជីវៈ ផ្តល់ឱកាសការងារ ការការពារខាងផ្លូវច្បាប់ និងបង្កើនតួនាទីស្ត្រីក្នុងការធ្វើសេចក្តីសម្រេចចិត្ត ព្រមទាំងលើកកម្ពស់តម្លៃស្ត្រីក្នុងសង្គម។
បច្ចុប្បន្ន ស្ត្រីដែលកាន់តួនាទីសំខាន់ៗ នៅក្នុងស្ថាប័ននយោបាយ រដ្ឋបាលថ្នាក់ជាតិ ថ្នាក់ក្រោមជាតិ និងស្ថាប័នផ្សេងៗ ក្នុងសង្គមមានការកើនឡើងជាលំដាប់ ដូចជា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធានកាកបាទក្រហមកម្ពុជា លោកជំទាវឧបនាយករដ្ឋមន្ត្រី លោកជំទាវអនុប្រធានរដ្ឋសភា សមាជិកព្រឹទ្ធសភា-រដ្ឋសភា រដ្ឋមន្ត្រី រដ្ឋលេខាធិការ អនុរដ្ឋលេខាធិការ អភិបាលរងរាជធានី-ខេត្ត សមាជិកក្រុមប្រឹក្សារាជធានី-ខេត្ត សមាជិកក្រុមប្រឹក្សាក្រុង-ស្រុក-ខណ្ឌ-ឃុំ-សង្កាត់ និងមេភូមិ ទាំងអស់នេះ សបញ្ជាក់ឱ្យឃើញយ៉ាងច្បាស់នូវការយកចិត្តទុកដាក់ខ្ពស់របស់រាជរដ្ឋាភិបាល ចំពោះស្ត្រី។
គូសបញ្ជាក់ថា ជារៀងរាល់ឆ្នាំ រាជរដ្ឋាភិបាលតែងតែលើកយកប្រធានបទមួយ ស្របទៅតាមស្ថានភាពជាក់ស្តែងរបស់កម្ពុជា និងពិភពលោកក្នុងគោលបំណងតែមួយ គឺរំលឹកអំពីវីរភាពរបស់ស្ត្រីក្នុងការតស៊ូធ្វើឱ្យ សម្រេចបាននូវសមភាព សមធម៌ សន្តិភាព និងការអភិវឌ្ឍសង្គម តាមរយៈការផ្លាស់ប្តូរឥរិយាបថរបស់មនុស្សនៅក្នុងគ្រួសារ សហគមន៍ សង្គម និងប្រទេសជាតិ សំដៅធានាឱ្យបាននូវការគោរពសិទ្ធិសេរីភាព ការទទួលស្គាល់នូវតម្លៃរបស់ស្ត្រី និងការចូលរួមដោយស្មើភាពនៅក្នុងសង្គម៕
