ទីតាំងល្បែងស៊ីសងហ្គេមអនឡាញមួយកន្លែង កំពុងដំណើរការយ៉ាងរលូនដោយគេពុំទាន់ឃើញសមត្ថកិច្ចខ័ណ្ឌ៧មករា ចុះបង្ក្រាប
ភ្នំពេញ: ទីតាំងណេត អត់យីហោមួយកន្លែង សង្ស័យអត់ច្បាប់ ស្ថិតនៅផ្សារឌុយម៉ិច ផ្ទះលេខ៥១Eo ផ្លូវ ១៣៤ សង្កាត់មនោរម្យ ខណ្ឌ៧មករា កំពុងបើកល្បែងស៊ីសងតាមអនឡាញ Joker និងល្បែងស៊ីសងគ្រប់ប្រភេទផ្សេងទៀតយ៉ាងរលូន ដោយគេពុំទាន់ឃើញសមត្ថកិច្ច ខ័ណ្ឌ៧មករា ធ្វើការបង្ក្រាប។
តាមការលើកឡើងរបស់ប្រជាពលរដ្ឋដែលរស់នៅក្បែនោះបានឲ្យដឹងថា ទីតាំងលេងល្បែងស៊ីសងមួយកន្លែងនោះ បើកទទួលភ្ញៀវលេងទាំងយប់ទាំងថ្ងៃ ជាពិសេសសម្បូរទៅដោយជនមានប្រវត្តិមិនល្អ គ្មានមុខរបរពិតប្រាកដ ចូលទៅលេងហ្គេម Joker យ៉ាងសប្បាយ ដោយ គេពុំឃើញអាជ្ញាធរសមត្ថកិច្ចក្នុងមូលដ្ឋានចុះបង្ក្រាបទប់ស្កាត់ទេ។
ប្រជាពលរដ្ឋដែលជិតខាងនោះ បានលួចបង្ហើបទៀតថា រាល់ថ្ងៃពួកគាត់មានការព្រួយបារម្ភយ៉ាងខ្លាំង ចំពោះសុខទុក្ខរបស់ពួកគាត់ ជាពិសេស គឺនៅពេលយប់ ព្រោះទីតាំងណេតបង្កប់ល្បែងស៊ីសងខុសច្បាប់មួយនេះកំពុងបើកដំណើរការយ៉ាងរលូននៅក្នុងមូលដ្ឋានពួកគាត់កំពុងរស់នៅ និងសំបូរទៅដោយជនញៀនល្បែងដែលមានសភាព ស្លេកស្លាំងដូចជនញៀនថ្នាំផងដែរ។
ប្រជាពលរដ្ឋដែលរស់នៅក្នុងសង្កាត់មនោរម្យ បានសំណូមពរទៅដល់លោក លឹម ភា អភិបាល នៃគណៈអភិបាលខណ្ឌ ៧មករា និងលោក នេត ស៊ីថុន អធិការនៃអធិការដ្ឋាននគរបាលខណ្ឌ ៧មករា សូមមេត្តាជួយទប់ស្កាត់បទល្មើសល្បែងស៊ីសងខុសច្បាប់ខាងលើនេះផង៕