ទឹកប្រាក់ជិត៤លានដុល្លារ ពីរសប្បុរសជន ដែលបានចូលរួមបរិច្ចាក តាមរយៈសម្ដេចតេជោ ជួយ ដល់មន្ទីរពេទ្យគន្ធបុបា្ផ តាមរយៈការប្រកួត បាល់ទាត់មិត្តភាព Cambodia Football Super Stars
ឯកឧត្តម ឃួង ស្រេង មានប្រសាសន៍ថា សម្តេចតេជោ ហ៊ុន សែន ប្រធានព្រឹទ្ធសភា នឹងចូលរួម ដឹកនាំការប្រកួត បាល់ទាត់ របស់ក្រុមបាល់ទាត់ តារាកម្ពុជា (Cambodia football super stars) ដែលមាន អ្នកចម្រៀង ខេម ជាប្រធានក្រុម និងក្នុងនាមសម្តេច ជាគ្រូបង្វឹកកិត្តិយស ដើម្បីគៀងគរថវិកា ពីសប្បុរជន ជួយដល់មន្ទីរពេទ្យគន្ធបុប្ផា នាល្ងាចថ្ងៃទី១ ឧសភា នៅពហុកីឡដ្ឋាន អូឡាំពិក រាជធានីភ្នំពេញ នាពេលខាងមុខនេះ ។
លោក ប៉ុន សុណារិន ហៅ ខេម ប្រធានក្រុមបាល់ទាត់ តារាកម្ពុជា (Cambodia football super stars ) បានឲ្យដឹងថា ចំពោះការប្រកួតនេះ មិនផ្ដោតលើការលើកពានរង្វាន់ ចាញ់ឈ្មះនោះទេ ការប្រកួតនេះ មានគោលបំណង៣ធំៗ ទី១ ដើម្បីផ្សព្វផ្សាយ បទបញ្ញា របស់រដ្ឋាភិបាល ដើម្បីលុបបំបាត់ គ្រឿងញៀន ទី២ ដើម្បីឲ្យមហាជន ចូលរូមលេងកីឡា ដើម្បីសុខភាព ក្រោមពាក្យស្លោក កីឡារស់ក្រោមម្លប់សន្តិភាព។ និងទី៣ ដើម្បីប្រមូល មូលនិធិ ជួយមន្ទីរពេទ្យគន្ធបុប្ផា។
អ្នកឧញ៉ា លាង ម៉េង បានបន្តទៀតថា ក្រុមហ៊ុន ជីប ម៉ុង តែងតែចូលរួម ជាសកម្មជាមួយ ប្រមុខរាជរដ្ឋាភិបាល និងក្នុងការផ្តល់ត្រលប់ ទៅសង្គមវិញ លើគ្រប់វិស័យ ហើយអ្នកឧញ៉ា សង្ឃឹមថា ក្រុមហ៊ុន ជីប ម៉ុង នឹងដើរតួរជានិមិត្តសញ្ញា នៃសប្បុរសធម៌ក្នុងសង្គមកម្ពុជា។
ការប្រកួតនេះមាន ៤ ក្រុមចូលរួម គឺក្រុមបាល់ទាត់ តារាកម្ពុជា ក្រុមបាល់ទាត់ សហព័ន្ធកីឡាគុនខ្មែរ ក្រុមបាល់ទាត់ S&E All Star និងក្រុមបាល់ទាត់ អ្នកបង្កើតមាតិកាសង្គម (Vlogger All Star )។
សូមបញ្ជាក់ថា ការប្រកួតព្រឹត្តិការណ៍ បាល់ទាត់មិត្តភាព សប្បុរសធម៌ ក្រោមមូលបទ «រួមគ្នាដើម្បីសប្បុរសធម៌ និងប្រយុទ្ធប្រឆាំងគ្រឿងញៀន» នឹងរួមគ្នាដើម្បី ប្រមូលថវិកាជួយដល់ មន្ទីរពេទ្យគន្ធបុប្ផា ដឹកនាំការប្រកួត ផ្ទាល់ដោយ សម្តេចតេជោ ហ៊ុន សែន ជាគ្រូបង្វឹកកិត្តិយស របស់ក្រុមបាល់ទាត់តារាកម្ពុជា Cambodia Football Super Stars មហាជន អាចចូលមកទស្សនា ការប្រកួត ដោយសេរី ធ្វើឡើងនៅ ថ្ងៃទី១ ខែឧសភា ឆ្នាំ ២០២៤ នៅពហុកីឡដ្ឋានជាតិ អូឡាំពិក ៕
