រថយន្តដឹកឈើឈ្មួញឈើឈ្មោះ ចក់ និងបក្ខពួកត្រូវសមត្ថកិច្ចតាមប្រម៉ាញ់ចាប់បាន២គ្រឿង ទាំងកណ្ដាលអធ្រាត្រ “ចំណុចស្ពានអូរទេ” នៅក្រុងសែនមនោរម្យ
ខេត្តមណ្ឌលគិរី៖ សមត្ថកិច្ចបានឱ្យដឹងថា គេប្រដេញចាប់យ៉ាងប្រផាប់ប្រភីងបានរថយន្តសាំយ៉ុងដែលដឹកឈើរបស់លោក ចក់ និងបក្ខពួកដែលដឹកឈើពេញប្រៀបចំនួន២ គ្រឿង កាលពីអធ្រាត្រឈានចូលថ្ងៃទី ០២ ឧសភានេះ នៅចំស្ពានអូរទេ ក្នុងក្រុងសែនមនោរម្យ ខេត្តមណ្ឌលគិរី ។
ករណីចុះតាមប្រម៉ាញ់ឈើរបស់ឈ្មួញឈើឈ្មោះ ចក់ និងបក្ខពួករបស់គេខាងលើនេះ លោក អ៊ាន ស៊ាងអន អភិបាលរងស្រុកពេជ្រាដា បានប្រាប់ក្រុមនារាយការណ៍ព័ត៌មានថា នៅវេលាម៉ោង១:៣០នាទីរំលងអាធ្រាត្រ ថ្ងៃទី០២ឧសភានេះ លោកនិងក្រុមមន្ត្រីជំនាញពីមន្ទីរបរិស្ថានខេត្តមណ្ឌលគិរី បានឃាត់ចាប់រថយន្តដឹកឈេីចំនួន០២គ្រឿង ដោយប្រដេញពីចំណុចវរ:៣០៣ ផ្លូវជាតិលេខ៧៦ ក្នុងឃុំពូជ្រៃស្រុក ពេជ្រាដា រហូតតាមទាន់ឃាត់ចាប់បាននៅចំណុចខាងលើ។
វត្ថុតាងឈេី និងរថយន្តទាំង០២គ្រឿង ត្រូវបានយកទៅរក្សាទុកនៅមន្ទីរបរិស្ថានខេត្ត០១គ្រឿង និង០១ គ្រឿងទៀតខូចនៅចំណុចស្ពានអូរទេ កំពុងរកមធ្យោ បាយយកទៅរក្សាទុក្ខនៅមន្ទីរបរិស្ថានខេត្ត។
គួរបញ្ជាក់ថា រថយន្តឈ្មួញឈើឈ្មោះលោក ចក់ និងបក្ខពួករបស់ឈ្មួញឈើខាងលើនេះ បើតាមការបង្ហើបអោយដឹងពីអ្នកភូមិពូជ្រៃឌីអេថា រថយន្តដឹកឈើល្មើសច្បាប់ របស់ក្រុមបក្ខពួកឈ្មួញឈើទាំងនេះ មានរថយន្តចំនួន៤គ្រឿង ដែលធ្វើចរាចរណ៍ដឹកជញ្ជូនឈើចេញពីពូជ្រៃស្រុកពេជ្យជ្រាដាខេត្តមណ្ឌលគិរី។ ខណៈពេលនេះកម្លាំងជំនាញបង្ក្រាបបាន២គ្រឿង នៅ២គ្រឿងទៀត ដែលមិនទាន់បង្ក្រាបបាន។
