ឯកឧត្តមបណ្ឌិត កៅ ថាច ប្តេជ្ញាបំពេញមុខងារដើម្បីគាំទ្រវិស័យកសិកម្ម លើកកម្ពស់ជីវភាពប្រជាកសិករ និងអភិវឌ្ឍន៍សេដ្ឋកិច្ចសង្គម
ភ្នំពេញ៖ ឯកឧត្តមបណ្ឌិត កៅ ថាច ប្រតិភូរាជរដ្ឋា ភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទនិងកសិកម្ម នៅក្នុងពិធីសម្ពោធធនាគារ ARDB សាខាខណ្ឌដូនពេញនៅថ្ងៃទី១៦ខែមករាឆ្នាំ២០២៥នេះ បានប្តេជ្ញាថា នឹងបន្តបំពេញមុខងាររួមរបស់ខ្លួន ដើម្បីគាំទ្រវិស័យកសិកម្មលើកកម្ពស់ជីវភាពប្រជាកសិករ និងអភិវឌ្ឍន៍សេដ្ឋកិច្ចសង្គម។
ពិធីសម្ពោធនេះ ក្រោមវត្តមាន ឯកឧត្តម រស់ សីលវ៉ា រដ្ឋលេខាធិការ និងជាតំណាងដ៏ខ្ពង់ខ្ពស់ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ,ឯកឧត្តម សុន គន្ធរ រដ្ឋមន្ត្រីប្រតិភូអមនាយករដ្ឋមន្ត្រី,លោក ជ ដារិទ្ធ នាយកសាខា ធនាគារជាតិនៃកម្ពុជាតំណាងលោកជំទាវបណ្ឌិត ជា សិរី អគ្គទេសាភិបាលធនាគារជាតិនៃកម្ពុជា សមាជិកក្រុមប្រឹក្សាភិបាលនៃធនាគារអភិវឌ្ឍន៍ជនបទ និងកសិកម្ម ដែលសរុបចំនួន ១៥០នាក់។
ក្នុងឱកាសនោះ ឯកឧត្តម រស់ សីលវ៉ា រដ្ឋលេខាធិការ បានសម្តែងនូវការស្វាគមន៍ ចំពោះការដាក់ឱ្យដំណើរការ ប្រតិបត្តិការអាជីវកម្មរបស់សាខាធនាគារអភិវឌ្ឍន៍ជនបទ និងកសិកម្ម ខណ្ឌដូនពេញ សង្កាត់ចតុមុខ ដែលជាសក្ខីភាពឆ្លុះបញ្ចាំងឱ្យឃើញអំពីភាពរីកចម្រើនទាំងទំហំ និងវិសាលភាពប្រតិបត្តិការធនាគារដល់គ្រប់តួអង្គក្នុងខ្សែច្រវាក់ផលិតកម្មកសិកម្ម និងអភិវឌ្ឍសេដ្ឋកិច្ចជនបទ។
ជាមួយគ្នានោះ ដើម្បីចូលរួមអនុវត្តគោលនយោបាយរបស់រាជរដ្ឋាភិបាលប្រកបដោយភាពជោគជ័យនឹងមានប្រសិទ្ធភាព ឯកឧត្តម រស់ សីលវ៉ា រដ្ឋលេខាធិការ ក៏បានស្នើឱ្យធនាគារអភិវឌ្ឍន៍ ជនបទ និងកសិកម្ម បន្តយកចិត្តទុកដាក់លើការងារសំខាន់ៗចំនួន៧ចំណុច ដូចខាងក្រោម៖
ទី១-ជំរុញការអនុវត្តមុំទី៣ “ការលើកស្ទួយវិស័យកសិកម្ម និងការអភិវឌ្ឍន៍ជនបទ” នៃ បញ្ចកោណទី៤ នៃយុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា, ទី២-បន្តពង្រឹងកិច្ចសហប្រតិបត្តិការយ៉ាងជិតស្និទ្ធជាមួយក្រសួង ស្ថាប័នពាក់ព័ន្ធ ដើម្បី អនុវត្តឱ្យសម្រេចបានលទ្ធផលល្អនូវភារកិច្ចទាំងឡាយដែលរាជរដ្ឋាភិបាល ប្រគល់ជូន
ទី៣-បន្តចូលរួមលើកកម្ពស់បរិយាបន្នហិរញ្ញវត្ថុ និងជំរុញការពង្រីកប្រតិបត្តិការ ធនាគារ តាមបែបឌីជីថល ស្របតាមគោលនយោបាយអភិវឌ្ឍន៍ធុរកិច្ចឌីជីថល
ទី៤-ជំរុញការផ្តល់ហិរញ្ញប្បទានបៃតង ដើម្បីធានាការអភិវឌ្ឍន៍ប្រកបដោយនិរន្តរភាព,ទី៥-បន្តកៀរគរប្រភពទុនបន្ថែម ពីប្រភពដែលមានសក្តានុពល ជាពិសេសប្រាក់បញ្ញើ,ទី៦-បន្តពង្រឹងប្រសិទ្ធភាពនៃប្រតិបត្តិការធនាគារ តាមរយៈការបណ្តុះបណ្តាលជំនាញ ដល់បុគ្គលិកគ្រប់លំដាប់ថ្នាក់បន្ថែមទៀត និង
ទី៧-បន្តជំរុញការផ្តល់ឥណទានឱ្យកាន់តែទូលំទូលាយ និងការបង្ខិតសេវាធនាគារឱ្យ កាន់តែកៀកនឹងអតិថិជន។
ឯកឧត្តមបណ្ឌិត កៅ ថាច បានសម្តែងនូវសុទិដ្ឋិនិយមថា ការដាក់ឱ្យដំណើរការប្រតិបត្តិការ អាជីវកម្មរបស់សាខាខណ្ឌដូនពេញ-សង្កាត់ចតុមុខនេះ នឹងដើរតួនាទីយ៉ាងសំខាន់សម្រាប់ការផ្តល់សេវា ធនាគារឱ្យកាន់តែទូលំទូលាយ ផ្តល់ភាពងាយស្រួល និងខិតជិតអតិថិជន ដូចជា ការផ្តល់ឥណទាន, ការធ្វើប្រតិបត្តិការដក-ដាក់ប្រាក់បញ្ញើ, ការធ្វើប្រតិបត្តិការផ្ទេរប្រាក់, ការធ្វើប្រតិបត្តិការទូទាត់សងប្រាក់ និងប្រតិបត្តិការធនាគារផ្សេងៗទៀត។
ក្នុងនាមជាធនាគារបម្រើគោលនយោបាយរបស់រាជរដ្ឋាភិបាលធនាគារ ARDB នឹងបន្តបំពេញ មុខងារ រួមចំណែកគាំទ្រវិស័យកសិកម្ម ក្នុងគោលដៅលើកកម្ពស់ជីវភាពរស់នៅរបស់ប្រជាកសិករ និង អភិវឌ្ឍន៍សេដ្ឋកិច្ចសង្គម ដោយផ្តោតសំខាន់លើចំណុចមួយចំនួន ដូចខាងក្រោម៖
១- បន្តការអនុវត្តគោលនយោបាយរបស់រាជរដ្ឋាភិបាល និងបង្កើនកិច្ចសហប្រតិបត្តិការជាមួយ ដៃគូអភិវឌ្ឍន៍ជាតិ និងអន្តរជាតិ
២- បន្តការធ្វើបរិវត្តកម្មទៅជាធនាគារឌីជីថល ទាំងផ្នែកប្រតិបត្តិការ និងការផ្តល់សេវាកម្មជូន អតិថិជន
៣- ជំរុញការកៀរគរប្រភពទុន និងហិរញ្ញប្បទានបន្ថែម សម្រាប់ពង្រីកសកម្មភាពរបស់ធនាគារ និង
៤- ជំរុញផលិតភាពអនុវត្តការងារប្រកបដោយវិជ្ជាជីវៈ តាមរយៈការអភិវឌ្ឍន៍សមត្ថភាពធនធានមនុស្ស៕
