មន្ត្រីចរាចរណ៍ផ្លូវគោកប្រមាណ១០នាក់ ដែលអនុវត្តច្បាប់នៅដងផ្លូវសាធារណៈហើយខ្វះសីលធម៌ បំពានវិជ្ជាជីវ នៅចំណុចខណ្ឌសែនសុខ ត្រូវបានស្នងការនគរបាលរាជធានីភ្នំពេញ ហៅឱ្យចូលខ្លួនទៅបំភ្លឺ
ភ្នំពេញ៖ លោក ស៊ន សុភក្ដ្រ បានលើកឡើងថា៖ មន្ត្រីនគរបាលខណ្ឌសែនសុខប្រមាណ១០នាក់ ដឹកនាំដោយលោកវរសេរនីយ៍ទោ ហឿង វឿន អធិការរងនគរបាលទទួលផែនចរាចរណ៍ខណ្ឌសែនសុខ នៅរសៀលថ្ងៃទី១៨ ខែកុម្ភៈ ឆ្នាំ២០២៥ ត្រូវបានស្នងការនគរបាលរាជធានីភ្នំពេញ ហៅមកសួរនាំ និងបំភ្លឺ ជុំវិញប៉ះទង្គិចជាមួយលោកបណ្ឌិត សុខ ទូច នាំឲ្យមានការផ្ទុះ និងចែកចាយព្រោងព្រាតនៅតាមបណ្តាញសង្គម។
សម្រាប់ហេតុការណ៍មួយនេះ លោកឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានបញ្ជាក់ហើយថា លោកនឹងធ្វើការលើរឿងនេះយ៉ាងម៉ត់ចត់ ហើយចាត់វិធានការតាមច្បាប់មិនលើកលែងនោះឡើយ សម្រាប់មន្ត្រីនគរបាលដែលអនុវត្តច្បាប់គ្មានសីលធម៌ និងវិជ្ជាជីវៈ។
សម្រាប់គោលដៅត្រួតពិនិត្យជាតិអាកុលដែលនាំឲ្យមានផ្ទុះបាតុភាពនេះ បានកើតឡើងនៅវេលាម៉ោង ១១៖៥៥នាទី យប់ថ្ងៃទី១៧ ខែកុម្ភៈ ឆ្នាំ២០២៥ ស្ថិតនៅមុខសាលាបឋមសិក្សាភ្នំពេញថ្មី តាមផ្លូវហាណូយ ខណ្ឌសែនសុខ រវាងកម្លាំង នគរបាលខណ្ឌសែនសុខ សហការជាមួយកម្លាំងនគរបាលអន្តរាគមន៍របស់ស្នងការដ្ឋាននគរបាលរាជធានីភ្នំពេញ។
សម្រាប់លោកវរសេនីយ៍ទោ ហឿង វឿន អធិការរងនគរបាលខណ្ឌសែនសុខទទួលផែនចរាចរណ៍ ដែលដឹកនាំកម្លាំងគោលដៅមួយនេះ កន្លងទៅខ្ញុំធ្លាប់ទទួលបានព័ត៌មានថា លោកធ្លាប់ប្រើពាក្យសំដីដាក់ពលរដ្ឋមិនសមរម្យច្រើន ពេលដឹកនាំចុះអនុវត្តការងារ ត្រួតពិនិត្យជាតិអាកុល និងរឹតបន្តឹងច្បាប់ចរាចរណ៍។ ឆ្លងកាត់បាតុភាពមួយនេះ ខ្ញុំសង្ឃឹមថា លោកនឹងមានការប្រែឥរិយាបថ ពាក្យសំដី និងកាយវិការរបស់លោកឡើងវិញ។
សម្តេចតេជោ ហ៊ុន សែន កន្លងទៅធ្លាប់បានប្រើពាក្យមួយឃ្លាថា «មន្ត្រី គឺជាខ្ញុំបម្រើដាច់ថ្លៃរបស់ប្រជាពលរដ្ឋ»។ «យើងមិនមែនជាចៅហ្វាយរបស់ប្រជាជននោះទេ យើងជាខ្ញុំបម្រើដ៏ស្មោះត្រង់បំផុតរបស់ប្រជាជន»។ ខ្ញុំគិតថា អ្វីៗកើតឡើងដោយសារ ការប្រើពាក្យសំដីប៉ុណ្ណោះ។
ទោះយើងជាសមត្ថកិច្ច និងដឹកនាំគោលដៅរឹតបន្តឹងច្បាប់ចរាចរណ៍ក៏ដោយ តែអ្នកធ្វើដំណើរតាមផ្លូវ សុទ្ធតែជាពលរដ្ឋរបស់យើងទេ ពាក្យសំដីគួរទន់ភ្លន់ជាមួយកាយវិការសមរម្យ នោះការអនុវត្តច្បាប់រឹតតែប្រសើរឡើង។
សម្រាប់យើងទាំងអស់គ្នា ក៏មិនបានបំភ្លេចគុណសម្បត្តិដ៏ធំធេងរបស់បងប្អូនសមត្ថកិច្ចនោះឡើយ ដែលបានចូលរួមការពារសន្តិសុខ និងសណ្តាប់ធ្នាប់ជូនប្រជាពលរដ្ឋទាំងថ្ងៃទាំងយប់។ ចំពោះមន្ត្រីនគរបាលចរាចរ ក៏បានដើរតួនាទីសំខាន់ណាស់ សម្រាប់ការសម្រួលធ្វើដំណើររបស់បងប្អូនទាំងថ្ងៃ ទាំងហាលភ្លៀង តែយើងក៏មិនគាំទ្រចំពោះបុគ្គលនគរបាលដែលខូច និងអនុវត្តលើសនោះទេ។
សម្តេចធិបតី ហ៊ុន ម៉ាណែត ធ្លាប់បានមានប្រសាសន៍ថា អ្នកបើកបរទាំងអស់ត្រូវមានស្មារតីប្រុងប្រយ័ត្ន គោរពច្បាប់ និងបើកបរដោយស្វ័យទទួលខុសត្រូវ ដោយមិនត្រូវខ្លាចនគរបាលចរាចរណ៍ចាប់នោះទេ។
ចំពោះវិធានការរឹតបន្តឹងច្បាប់ចរាចរណ៍ និងពិនិត្យជាតិអាកុលនេះ គឺជាការណែនាំជាប្រចាំរបស់ប្រមុខរាជរដ្ឋាភិបាល រដ្ឋមន្ត្រីក្រសួងមហាផ្ទៃ និងអគ្គស្នងការនគរបាលជាតិ ហើយស្នងការដ្ឋាននគរបាលរាជធានីភ្នំពេញ ក៏មិនបានបោះបង់ចំពោះការងារមួយនេះដែរ ពោលត្រូវតែពង្រឹងរបៀបរបបការងារ ក្រមសីលធម៌ និងវិជ្ជាជីវៈរបស់កងកម្លាំងឲ្យកាន់តែល្អប្រសើរឡើង ចៀ់សវាងបង្កបាតុភាពដូចករណីជាមួយលោកបណ្ឌិត សុខ ទូច ដូចនៅពេលនេះ។
តែសម្រាប់មន្ត្រីនគរបាលអន្តរាគមន៍ដែលបានប្រើកាយវិការរុញលោកបណ្ឌិត សុខ ទូច ចង់ដួលនោះ ខ្ញុំនៅតែឲ្យមានការទទួលខុសត្រូវ និងរងការពិន័យរបស់កងកម្លាំងនគរបាលជាតិ ដោយមិនអាចលើកលែងបានឡើយ៕
