ជនសង្ស័យម្នាក់ត្រូវអាវុធហត្ថចាប់ខ្លន ពាក់ព័ន្ធករណីឆបោកក្លែងឯកសារវិញ្ញាបនបត្រសម្គាល់អចលនវត្ថុ ដើម្បីដាក់បញ្ចាំ
ភ្នំពេញ៖ លោក ឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស បានធ្វើការឃាត់ខ្លួនបុរសម្នាក់ ពាក់ព័ន្ធករណីក្លែងឯកសារវិញ្ញាប័នបត្រសម្គាល់អបនវត្ថុ ដើម្បីដាក់បញ្ជាំ។ ហេតុការណ៍ឃាត់ខ្លួនជនសង្ស័យរូបនេះបានធ្វើឡើង កាលពីនៅថ្ងៃទី១៩ ខែកក្កដា ឆ្នាំ២០២២នេះ នឹងបាននាំខ្លួនជនសង្ស័យរូបនោះទៅអយ្យការអមសាលាដំបូងរាជធានីភ្នំពេញ។
ករណីនេះ កម្លាំងជំនាញនគរបាលយុត្តិធម៌ ក៍បានធ្វើការស្រាវជ្រាវ ស៊ើបអង្កេតតាមពាក្យបណ្ដឹងរបស់ជនរងគ្រោះដែលជាម្ចាស់កម្មសិទ្ធិនៃអចលនវត្ថុមួយកន្លែងមានទីតាំងស្ថិតនៅភូមិកប់ស្រូវធំ សង្កាត់គោករកា ខណ្ឌព្រែកព្នៅ រាជធានីភ្នំពេញ។
តាមការបញ្ជាក់ពីជនរងគ្រោះថា ថ្មីៗនេះខ្ញុំបាទទើបតែទទួលបានព័ត៌មាន និងឯកសារថតចម្លងពីបុគ្គលផ្សេងទៀតបង្ហាញថា វិញ្ញាបនបត្រសម្គាល់អចលនវត្ថុរបស់ខ្ញុំបាទត្រូវបានផ្ទេរចេញទៅឈ្មោះ ឈឿង ច័ន្ទពិសិដ្ឋ និងឈ្មោះ ទុំ ដាឡែន ទៅវិញ ដែលការពិតដីនេះគឺខ្ញុំបាទពុំធ្លាប់ដែលបានលក់ដូរ ឬធ្វើការចាត់ចែងណាមួយទៅតតីយជននៅឡើយទេ។
ក្រោយពីធ្វើការស៊ើបអង្កេតបឋមតាមនីតិវិធីរួចមក និងធ្វើសេចក្តីរាយការណ៍ជូនទៅឯកឧត្តម ព្រះរាជអាជ្ញាអមសាលាដំបូងរាជធានីភ្នំពេញ ក៏ឈានដល់ការនាំខ្លួនបុគ្គលសង្ស័យឈ្មោះ ឈឿង ពិសិដ្ឋ ភេទប្រុស អាយុ៤១ឆ្នាំ តាមដីកាបញ្ជាឱ្យចូលខ្លួនលេខៈ ៣១៧ អ.យ.ក ចុះថ្ងៃទី១៥ ខែកក្កដា ឆ្នាំ២០២២។
បច្ចុប្បន្ន ជនសង្ស័យត្រូវបានក៍សាងសំណុំរឿងទៅតុលាការ ដើម្បីចាត់ការតាមនិតិវិធី៕
