រដ្ឋមន្ត្រីអប់រំអំពាវនាវដល់ម្ចាស់សណ្ឋាភាព ផ្ទះសំណាក់ និងអាហារដ្ឋាន ឱ្យជួយសម្រួលដល់សិស្សប្រឡងបាក់ឌុប
ភ្នំពេញ៖ លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា នៅក្នុងសន្និសីទកាសែតមួយនាថ្ងៃទី ២១ វិច្ឆិកា នេះ បានអំពាវនាវដល់ម្ចាស់សណ្ឋាគារ ផ្ទះ សំណាក់ និងម្ចាស់ហារដ្ឋាននានាឲ្យជួយសម្រួលដល់បេក្ខជនប្រឡងដែលមកពីតាមស្រុក ឃុំ ឬមកពីតំបន់ដាច់ស្រយ៉ាល ដែលត្រូវប្រឡងនៅទីរួមខេត្ត ឬទីស្រុក ឱ្យទទួលបានកន្លែងស្នាក់នៅសមរម្យ និងមានសុវត្ថិ ភាព។
លោកថ្លែងដូច្នេះថា «សូមអំពាវនាវឱ្យសណ្ឋាគារ ក៏ដូចកន្លែងស្នាក់នៅភោជនីយដ្ឋាន និងកន្លែងលក់អាហារផ្សេងៗជួយសម្រួលដល់បេក្ខជនដែលមកពីតាមស្រុក ពីតាមឃុំ ដែលត្រូវមកប្រឡងនៅទីរួមខេត្ត ក៏ដូចជាទីរួមស្រុកមួយចំនួន ដើម្បីធានានូវសុវត្ថិភាព និងផ្លូវនូវភាពងាយស្រួលក្នុងការស្នាក់នៅ និងហូបចុករបស់បេក្ខជនដែលមកប្រឡងផងដែរ»។
ជាមួយគ្នានេះលោករដ្ឋមន្ត្រីក៍បានផ្តាំផ្ញើដល់សិស្សដែលជាបេក្ខជនប្រឡងទាំងអស់ ត្រូវទទួលទានអាហារ និងដំណេកឱ្យបានគ្រប់គ្រាន់ និងកាត់បន្ថយអារម្មណ៍ធុញថប់ និងតានតឹង ដើម្បីកុំឱ្យប៉ះពាល់សុខភាពពេលប្រឡង។
សូមជម្រាបថា ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបសម័យប្រឡងថ្ងៃទី៥ ខែធ្នូ ឆ្នាំ ២០២២ ខាងមុខនេះមានបេក្ខជនសរុបចំនួន ១២៨ ១៣៤ នាក់ និងមានមណ្ឌលប្រឡងចំនួន ២២១ ត្រូវជា ៥ ២២៧បន្ទប់៕