ក្រុមឈ្មួញប្រើល្បិចថ្ពិនភ្នែកសមត្ថកិច្ច យករថយន្ត៤ផ្លូវដឹកដើមឫស្សីបង្កប់ឈើខុសច្បាប់
ខេត្តក្រចេះ៖ កាលពីថ្ងៃទី៨ ខែធ្នូ ឆ្នាំ២០២២ កម្លាំងកងរាជអាវុធហត្ថស្រុកឆ្លួង បានឃាត់រថយន្តម៉ាកហ៊ីយ៉ាន់ដាយប្រភេទ៤ផ្លូវ ពាក់ស្លាកលេខ ៣A ៥៩៤៦ ដែលបានធ្វើដំណើរឆ្លងកាត់ស្រុកឆ្លូង មកដល់ចំណុចភូមិបានជ័យ១ ឃុំហានជ័យ ត្រូវសមត្ថកិច្ចកងរាជអាវុធហត្ថស្រុក ស្ទាក់ចាប់រថយន្តនោះត្រួតពិនិត្យរកឃើញបង្គោលឈើក្រាក់ជាច្រើនបង្កប់ក្រោមដើមឫស្សី ដែលក្រុមឈ្មួញត្រៀមបញ្ជូនទៅចែកចាយ។
ពាក់ព័ន្ធករណីនេះលោក កង ស៊ុម មេបញ្ជាការកងរាជអាវុធហត្ថស្រុកឆ្លូងបញ្ជាក់ថា ក្រោយចុះឃាត់រថយន្តដឹកឈើខុសច្បាប់នេះខាងលើនេះ មន្ត្រីកងរាជអាវុធហត្ថស្រុកឆ្លូងខេត្តក្រចេះ បានរៀបចំឯកសារនាំយករថយន្ត និងវត្ថុតាងប្រគល់ជូនទៅជំនាញរដ្ឋបាលព្រៃឈើស្រុកឆ្លូង ដើម្បីរក្សាទុកនិងបន្តនីតិវិធី។
ចំណែកម្ចាស់រថយន្តម៉ាកហ៊ីយ៉ាន់ដាយប្រភេទ៤ផ្លូវ ត្រូវបានមន្ត្រីជំនាញកងរាជអាវុធហត្ថសួរនាំ និងធ្វើកំណត់ហេតុ ហើយត្រៀមបញ្ជូនបន្តទៅកាន់បញ្ជាការដ្ឋានកងរាជអាវុធហត្ថខេត្តក្រចេះ បន្តទៀត។
សូមបញ្ជាក់ថា មួយរយៈពេលនេះ ក្រុមឈ្មួញជួញឈើនៅខេត្តក្រចេះល្បីៗ(ដូចជាឈ្មោះ ធា, ឈ្មោះចែមុំ,ឈ្មោះស្រីល័ក្ខ,ឈ្មោះលោក ឆាយ,)ដឹកចេញតាមផ្លូវជាតិលេខ៧ ផ្លូវភ្ជាប់ពីខេត្តស្ទឹងត្រែង ស្រុកសំបូខេត្តក្រចេះ បានធ្វើសកម្មភាពដឹកជញ្ជូនឈើខុសច្បាប់យ៉ាងអាណាធិបតេយ្យ យកទៅលក់ឲ្យដេប៉ូឈើមួយចំនួនដែលមានត្រឹមតែច្បាប់ដេប៉ូឈើ តែគ្មានច្បាប់សម្បទានព្រៃឈើរបស់រដ្ឋនោះ។
យ៉ាងណាក៏ដោយ លើបញ្ហាការលាក់បន្លំផលអនុផលធនធានធម្មជាតិ(បទល្មើសព្រៃឈើ)ក៍ដូចជាការកាប់បំផ្លាញ់ព្រៃឈើចំណុចព្រៃការពារភ្នំព្រិច រួមទាំងកាប់កូនឈើជញ្ជូនមកដុតកម្ទិចឱ្យក្លាយទៅជាធ្យូង ដើម្បីប្រព្រឹតបទល្មើសឆ្លងដែល លក់ ប្រទេសវៀតណាមដោយខុសច្បាប់ សូមឯកឧត្តម វ៉ា ថន អភិបាលខេត្តក្រចេះ មេត្តាបញ្ជាកម្លាំងមន្ទីរបរិស្ថាន និងជំនាញរដ្ឋបាលព្រៃឈើ ដើម្បីមានចំណាត់ការទប់ស្កាត់ផងទាន។
បើពុំដូចច្នេះទេ ព្រៃឈើដែលនៅសេសសល់ចំណុចខ្លះនៃព្រៃការពារ(ភ្នំព្រិច-ព្រៃឡង់ ក្នុងខេត្តក្រចេះ)និងត្រូវរលាយហិនហោច គ្មានសល់អ្វីទៀតឡើយ៕
