ពិតជាអាសូណាស់! មនុស្ស៣នាក់ ត្រូវបានស្លាប់បាត់បង់ជីវិតដោយសារការចូលកាប់ដើមសំរ៉ងយកផ្លែលក់ ក្នុងចំណោមអ្នកទាំងបីរមានម្នាក់ស្លាប់ដោយសារអត់អាហារនៅក្នុងព្រៃសំរ៉ង
ខេត្តរតនគិរី៖ ប្រជាពលរដ្ឋបានឲ្យដឹងថា បន្ទាប់ពីអាជ្ញាធរខេត្តរតនគិរី បានបើកព្រៃសំរ៉ងគ្រប់តំបន់នៅតាមបណ្តាស្រុកក្នុងខេត្តរតនគិរី ដើម្បីឲ្យប្រជាពលរដ្ឋចូលទៅរើសផ្លែសំរ៉ងព្រៃ ដើម្បីយកទៅលក់សម្រាប់ផ្គត់ផ្គង់ជីវភាពបន្ថែម ក្នុងនោះប្រជាពលរដ្ឋចំនួន៣នាក់ ត្រូវបានស្លាប់បាត់បង់ជីវិ នៅក្នុងព្រៃសំរ៉ងយ៉ាងអាណោចអាធម៌។
ក្រុមប្រជាពលរដ្ឋបានឲ្យដឹងទៀតថា ចំណែកជនរងគ្រោះទាំងបីរអ្នកនេះ ទីមួយត្រូវគេស្គាល់ត្រឹមតែឈ្មោះ ថា ភេទប្រុស និងម្នាក់ទៀតត្រូវជាកូនប្រុសឈ្មោះលោក អៀន អ្នកទាំងពីមានទីលំនៅរស់នៅភូមិចងឃុំញ៉ាងស្រុកអណ្តូងមាស ករណីនេះដោយសារអ្នកទាំងពីរចូលទៅអាររំលំដើមសំរ៉ងយកផ្លែនៅចំណុចក្បែរោងអ្នកមួយតាមផ្លូវក្រវ៉ាត់ព្រំដែនត្រង់ចំណុចបង្គាល់លេខ១១ ស្លាប់កាលពីថ្ងៃទី១៣ខែមេសាឆ្នាំ២០២៤នេះ។ ម្នាក់ទៀត ជាជនដើមភាគតិចចារ៉ាយ ភេទប្រុស រស់នៅភូមិឡុំ ឃុំប៉កញ៉ៃ ស្រុកអូរយ៉ាដាវ។ តាមប្រភពថា មុនពេលកើតហេតុបុរសរូបនេះបានប្រាប់អ្នកផ្ទះថា រូបគេបចេញទៅប៉េះផ្លែសំរ៉ងនៅចំណុច”អូរលាវ”ក្នុងភូមិសាស្ត្រទឹកដីស្រុកអូរយ៉ាដាវខេត្តរតនគិរី។ តាមការបង្ហើបអោយដឹងទៀតថា ដោយបុរសរូបនេះចូលទៅរកផ្លែសំរ៉ង ក្នុងព្រៃជ្រៅហើយពុំមានទឹកនិងចំណីអាហាបរិភោគ រួចក៍បណ្តាលឲ្យកើតខ្យល់នៅព្រៃសំរ៉ងស្លាប់តែម្តង។
រយៈពេលប៉ុន្មានថ្ងៃចុងក្រោយនេះ បន្ទាប់ពីផ្លែសំរ៉ងនៅខេត្តរតនគិរី មានហាងឆេងឡើងខ្ពស់ ខណៈពេលនោះត្រូវគេឃើញមានសមត្ថកិច្ចជាច្រើនស្ថាប័ន”ដូចជាមន្ត្រីនគរបាល,មន្ត្រីបរិស្ថាន,កម្លាំងទាហាន បានដាក់បារាស់
ចាំបក់ដៃយកលុយពីប្រជាជនដែលចូលទៅកាប់ដើមសំរ៉ងយកផ្លែលក់ ម៉ូតូចូលទៅព្រៃសំរ៉ងមួយគ្រឿងគេយកក្នុងតម្លៃ៤ម៉ឺនរៀល និងរថយន្តចូលដឹកសំរ៉ងមួយគ្រឿងគេយកលុយចាប់ពី១៤០០០០០៛ រហូត២០០០០០០៛ លើសពីនេះសមត្ថកិច្ចទាំងនេះបានដាក់បារាស់ពង្រាយគ្រប់កន្លែងចាប់តាំងពីព្រៃបរិស្ថាននៅផ្នែកខាងក្នុងរហូតដល់ផ្លូវក្រវ៉ាត់ព្រំដែនភូមិចង និងប៉ុស្តិ៍តាង៉ា ជាដើម។
បើទោះជា ឯកឧត្តម ញ៉ែម សំអឿន អភិបាលខេត្តរតនគិរី ថ្មីៗនេះលោកបានបង្ហោះសារតាមបណ្តាញសង្គម ហាមមិនអោយសមត្ថកិច្ចខេត្ត ស្រុក ក្រុង យកលុយពីប្រជាពលរដ្ឋដែលទៅរើសនិងដឹកផ្លែសំរ៉ងដាច់ខាត នោះក៍ដោយ។
លើសពីនេះ ឯកឧត្តម ញ៉ែម សំអឿន អភិបាលខេត្តរតនគិរី និងជា ប្រធានគណៈបញ្ជាការឯកភាពខេត្ត បានដាក់បទបញ្ជា ដល់កម្លាំងទាំង៣ចាប់ពីថ្នាក់ខេត្ត និង ស្រុកតាវែង វើនសៃ អណ្តូងមាស ក្រុងបានលុង ពិនិត្យមើល និងណែនាំដល់កំលាំងហាមទារលុយពីប្រជាពលរដ្ឋរើស និងដឹកសំរ៉ងជាដាច់ខាតនិងត្រូវតាមចាប់ជនណាដែលយកឈ្មោះកំលាំងប្រើប្រាស់ដើម្បីជំរិតទារលុយ ។
ឯកឧត្តម អភិបាលខេត្តបានចាត់ទុកការយកលុយពីប្រជាពលរដ្ឋដែលដឹកផ្លែសំរ៉ងនិងរើសសំរ៉ងជាអំពើចាប់ជំរិត។ចំណែកប្រជាពលរដ្ឋមិនត្រូវជូនប្រាក់ដល់អ្នកណាឡើយ ។ ហើយបើមានជនណាទារលុយពីបងប្អូន អាចរាយការណ៍មកឯកឧត្តមផ្ទាល់នូវឈ្មោះជននោះ មុខងារនិង ទីតាំងដែលជំរិត។ឯកឧត្តម អភិបាលខេត្តក៏បានផ្តាំផ្ញើដល់បងប្អូនប្រជាពលរដ្ឋដែលទៅរើសសំរ៉ង សូមថែសុខភាព និងប្រយ័ត្នប្រយ៉ែង និងសូមកុំកាប់ដើមសំរ៉ង។
ករណី ការដាក់បទបញ្ជាយ៉ាងមុឺងម៉ាត់នេះ ធ្វើឡើងក្នុងសារបណ្តាញទំនាក់ទំនងសង្គមតេឡេក្រោម វេលាម៉ោង ៦,៤៣នាទីយប់ថ្ងៃទី១៩ ខែមេសាឆ្នាំ២០២៤នេះ។
យ៉ាងណាក៍ដោយ បើទោះជាឯកឧត្តម ញ៉ែម សំអឿន អភិបាលខេត្តរតនគិរី ហាមមិនឱ្យសមត្ថកិច្ចនិងជនស៊ីវិល មិនអោយក្រុមទាំងនេះដាក់បារាស់ចាំយកលុយដឹកជញ្ជូនផ្លែសំរ៉ងនៅព្រៃការពារដោយបរិស្ថាន ក៍ក្រុមមន្ត្រីទាំងនេះ នៅតែបន្តជំរិតយកលុយពីប្រជាពលរដ្ឋដ៍ដែលនៅព្រៃការពារដោយបរិស្ថានខាងលើនេះ និងមួយផ្នែកទៀត ត្រូវគេឃើញសមត្ថកិច្ចនគរបាល និងកម្លាំងទាហាន ដាក់កុងត្រូលជជុះចាំយកលុយពីផ្លែសំរ៉ងនៅចំណុចច្រករបៀងប៉ុស្តិ៍តាង៉ាដែលក្រុមឈ្មួញជាច្រើនអ្នកបានសម្រុកដឹកជញ្ជូនផ្លែសំរ៉ងតាមរថយន្តឆ្លងទៅលក់ឱ្យវៀតណាម៕