មជ្ឈមណ្ឌលស្រាវជ្រាវបានឲ្យដឹងថា រុស្សីកែឆ្នៃរថក្រោះចាស់ៗដើម្បីប្រើប្រាស់ឡើងវិញ បន្ទាប់ពីបាត់បង់ ៣០០០ គ្រឿងក្នុងសង្គ្រាមអ៊ុយក្រែន
(Reuters)៖ កាលពីថ្ងៃអង្គារ មជ្ឈមណ្ឌលស្រាវជ្រាវនាំមុខមួយបាននិយាយថា រុស្ស៊ីបានបាត់បង់រថក្រោះជាង ៣០០០គ្រឿង ក្នុងសង្គ្រាមប្រទេសអ៊ុយក្រែន ដែលស្មើនឹងចំនួនមុនសង្គ្រាមទាំងមូលរបស់ខ្លួន ប៉ុន្តែនៅមានរថក្រោះគ្រប់គ្រាន់ដែលមានគុណភាពទាប ដែលបានរក្សាទុកជាច្រើនឆ្នាំសម្រាប់ការជំនួស។
វិទ្យាស្ថានអន្តរជាតិសម្រាប់ការសិក្សាយុទ្ធសាស្ត្របាននិយាយថា អ៊ុយក្រែនក៏បានរងការខាតបង់យ៉ាងធ្ងន់ធ្ងរផងដែរ ចាប់តាំងពីរុស្ស៊ីបានឈ្លានពានក្នុងខែកុម្ភៈ ឆ្នាំ២០២២ ប៉ុន្តែការបំពេញបន្ថែមផ្នែកយោធារបស់ប្រទេសលោកខាងលិចបានអនុញ្ញាតឲ្យអ៊ុយក្រែននៅតែរក្សាចំនួនសារពើភ័ណ្ឌស្របពេលដែលមានការធ្វើឲ្យប្រសើរនូវគុណភាព។
ទោះបីជាបន្ទាប់ពីការបាត់បង់រថក្រោះជាច្រើន រួមទាំងការប៉ាន់ប្រមាណចំនួន ១.១២០ កាលពីឆ្នាំទៅ ប្រទេសរុស្ស៊ីនៅតែមានចំនួនប្រហែលពីរដងនៃអ៊ុយក្រែន នេះបើយោងតាមសមតុល្យយោធាប្រចាំឆ្នាំរបស់ IISS ដែលជាឧបករណ៍ស្រាវជ្រាវដ៏សំខាន់សម្រាប់អ្នកវិភាគផ្នែកការពារជាតិ។
លោក Henry Boyd ដែលជាសហការីជាន់ខ្ពស់របស់វិទ្យាស្ថានសម្រាប់សមត្ថភាពយោធាបាននិយាយថា ប្រទេសរុស្ស៊ីបាននិងកំពុងស្ថិតក្នុងស្ថានភាព “មិនខាតបង់” ដោយយករបស់ជំនួស។ លោកប៉ាន់ប្រមាណថា រុស្សីបានដាក់រថក្រោះប្រមាណពី ១.០០០ទៅ១.៥០០គ្រឿងបន្ថែមទៀតក្នុងឆ្នាំកន្លងទៅ។
ប៉ុន្តែលោកបាននិយាយថា ក្នុងចំណោមរថក្រោះទាំងនេះ ច្រើនបំផុតចំនួន ២០០ គ្រឿងត្រូវបានសាងសង់ថ្មី ហើយភាគច្រើនត្រូវបានកែលម្អម៉ូដែលចាស់យកមកប្រើប្រាស់វិញ៕