ឪពុកចុង ក្រោយពីបង្ខំរំលោភកូនចុងអាយុ ១២ឆ្នាំ បានសម្រេចជាប់ខ្នោះបាត់
ខេត្តរតនគិរី: កម្លាំងអធិការដ្ឋាននគរបាលស្រុកកូនមុំ បានឃាត់ខ្លួនបុរសជាឪពុកចុងម្នាក់ ពាក់ព័ន្ធករណីរំលោភសេពសន្ទវៈលើកូនស្រីចុង ហេតុការណ៍ឃាត់ខ្លួននេះបានធ្វើឡើង នៅថ្ងៃទី២៩ ខែកញ្ញា ឆ្នាំ២០២១នេះ ស្ថិតនៅចំណុចភូមិ១ ឃុំត្រពាំងច្រេស ស្រុកកូនមុំ ខេត្តរតនគិរី។
តាមរបាយការណ៍នគរបាលស្រុកកូនមុំបានបញ្ជាក់ថា ជនសង្ស័យជាឪពុកចុងរូបនេះមានឈ្មោះ ប៊ុន គ្រី ហៅគុណ អាយុ៦០ឆ្នាំ ជនជាតិខ្មែរ មុខរបរកសិករ មានទីលំនៅភូមិ១ ឃុំត្រពាំងច្រេស ស្រុកកូនមំំ ខេត្តរតនគិរី ត្រូវបានកម្លាំងសមត្ថកិច្ចឃាត់ខ្លួនពាក់ព័ន្ធករណីរំលោភសេពសន្ទវៈលើកូនស្រីចុងរបស់ខ្លួន។
ពាក់ព័ន្ធករណីឃាត់ខ្លួនបុរសចំណាស់រូបនេះ បានធ្វើឡើងបន្ទាប់ពីគ្រួសារ សាច់ញាតិជនរងគ្រោះបានដាក់ពាក្យបណ្ដឹងនៅប៉ុស្ដិ៍នគរបាលស្រុកកូនមុំ នៅវេលាម៉ោង៦,៣០នាទី ព្រឹកថ្ងៃទី២៩ កញ្ញានេះ ។
ជនរងគ្រោះមានឈ្មោះ គ.ស.ធ អាយុ១២ឆ្នាំ ជាសិស្ស មានទីលំនៅភូមិឃុំកើតហេតុខាងលើ។
របាយការណ៍បានបញ្ជាក់ទៀតថា ការឃាត់ខ្លួនជនសង្ស័យខាងលើនេះ ត្រូវបានធ្វើឡើងតាមបណ្ដឹងជនរងគ្រោះបានរៀបរាប់ថា អំឡុងថ្ងៃទី២៥ ខែកញ្ញា ឆ្នាំ២០២១ ពេលថ្ងៃត្រង់នៅលើផ្ទះរបស់ខ្លួនឯង ជនសង្ស័យបានចាប់រំលោភសេពសន្ទវៈ ០១លើកបានសម្រេច ដល់ថ្ងៃទី២៧ ខែកញ្ញា ឆ្នាំ២០២១ វេលាម៉ោង១៣,០០នាទី ជនសង្ស័យក៍បានធ្វើសកម្មភាពចាប់រំលោភសេពសន្ទ វៈ ០១លេីកទៀត តែមិនបានសម្រេចដោយជនរងគ្រោះបានរើបម្រះរួចខ្លួន ហើយបានរត់ទៅរកម្ដាយរបស់ខ្លួន រហូតដល់ថ្ងៃទី២៩ ខែកញ្ញា ឆ្នាំ២០២១នេះ ទើបម្ដាយក្មេងរងគ្រោះមកដាក់ពាក្យបណ្ដឹងដល់សមត្ថកិច្ចឲ្យជួយរកយុត្តិធម៌។
បច្ចុប្បន្ន ជនសង្ស័យត្រូវបានសមត្ថកិច្ចជំនាញស្រុកកូនមុំធ្វើការឃាត់ខ្លួន ដើម្បីសួរនាំនៅអធិការដ្ឋាននគរបាលស្រុកកូនមុំ និងកសាងសំណុំរឿង រួចបញ្ជូនខ្លួនទៅតុលាការខេត្ត តាមនីតិវិធី៕
