ធុរជនចិនមកពីក្រុងតុងគួនមកផ្សព្វផ្សាយពីពិព័រណ៍ផលិតផលពាណិជ្ជកម្មកែច្នៃប្រទេសចិនដល់ធុរជនកម្ពុជា
ដើម្បីជំរុញការដោះដូរពាណិជ្ជកម្មរវាងកម្ពុជា និងចិនបន្ថែមទៀត ធុរជនមកពីប្រទេសចិន ក្នុងក្រុងតុងគួន បានមកផ្សព្វផ្សាយពី ពិព័រណ៍ផលិតផលពាណិជ្ជកម្មកែច្នៃប្រទេសចិនដល់ធុរជនកម្ពុជា ក្នុងការចាប់យកឱកាសនៃការធ្វើពាណិជ្ជកម្មរវាងធុរជនកម្ពុជានិងចិន ។
នៅក្នុងសន្និសីទផ្សព្វផ្សាយ ស្ដីពីពិព័រណ៍ផលិតផលពាណិជ្ជកម្មកែច្នៃប្រទេសចិន កាលពីរសៀលថ្ងៃទី១៥ មិថុនា ២០២៣ លោក វូ គួឈាន អគ្គទីប្រឹក្សាការិយាល័យប្រឹក្សាសេដ្ឋកិច្ចពាណិជ្ជកម្មនៃទីក្រុងតុងគួនប្រចាំកម្ពុជា បានមានប្រសាសន៍ថា ពិព័រណ៍ផលិតផលពាណិជ្ជកម្មកែច្នៃប្រទេសចិន គឺជាពិព័រណ៍ថ្នាក់ជាតិតែមួយគត់ដែលជំរុញប្រធានបទស្ដីពីការអភិវឌ្ឍការកែច្នៃប្រឌិតថ្មីនៃពាណិជ្ជកម្មកែច្នៃ ។ មកដល់បច្ចុប្បន្ននេះ ទីក្រុងតុងគួន បានប្រារព្ធដោយជោគជ័យនូវពិព័រណ៍នេះចំនួន១៣លើក ។
បច្ចុប្បន្នពិព័រណ៍នេះ កំពុងជំរុញឥតឈប់ឈរដើម្បីអភិវឌ្ឍឱ្យកាន់តែអន្តរជាតិភាវូបនីយកម្ម មិនត្រឹមតែប៉ណ្ណឹង ថែមទាំងបង្ហាញឱ្យឃើញពីសមិទ្ធផលដ៏ល្អឥតខ្ចោះ នៃពាណិជ្ជកម្មប្រទេសចិន ដែលទាំងក្លាយទៅជាវេទិកានៃការនាំចូលផលិតផលគុណភាពល្អពីក្រៅប្រទេសចូលក្នុងទីផ្សារប្រទេសចិន និងជំរុញកិច្ចសហប្រតិបត្តិការសមត្ថភាពឧស្សាហកម្មអន្តរជាតិ ។
លោកបន្តថា ប៉ុន្មានឆ្នាំចុងក្រោយនេះ ទំហំផលិតផលសរុបនៃវិស័យឧស្សាហកម្មកែច្នៃរបស់កម្ពុជា បានរីកចម្រើនយ៉ាងឆាប់រហ័ស ប្រទេសកសិផលគុណភាពល្អដែលទទួលបានការអនុញ្ញាតឱ្យនាំចូលទៅកាន់ទីផ្សារប្រទេសចិនកាន់តែច្រើនឡើង ប៉ុន្តែសមត្ថភាពផលិតនៃវិស័យឧស្សាហកម្មកែច្នៃរបស់ប្រទេសកម្ពុជា នៅតែមានកម្រិត សង្ឃឹមថាតាមរយៈពិព័រណ៍ផលិតផលពាណិជ្ជកម្មកែច្នៃប្រទេសចិន ដែលជាវេទិកាអន្តរជាតិ អាចផ្ដល់ឱ្យវិស័យកម្មន្តសាលរបស់កម្ពុជានូវផលិតផលកាន់តែមានភាពប្រកួតប្រជែង ជួយដល់សហគ្រាសកម្ពុជាលើកកម្ពស់សមត្ថភាពប្រកួតប្រជែងនិងពង្រីកទីផ្សារឱ្យបានកាន់តែឆាប់រហ័ស ។
លោកជំទាវ ខា ឡេង រដ្ឋលេខាធិការក្រសួងពាណិជ្ជកម្មកម្ពុជា បានមានប្រសាសន៍ថា ចំណងមិត្តភាពរវាងកម្ពុជា និងប្រទេសចិន កាន់តែមានភាពរឹងមាំពីមួយឆ្នាំទៅមួយឆ្នាំ ហើយឆ្នាំ ២០២៣នេះ ជាឆ្នាំមិត្តភាព កម្ពុជា ចិន និងជាខួបលើកទី៦៥ នៃការបង្កើតទំនាក់ទំនងការទូតជាមួយគ្នា ហើយចំណងមិត្តភាពនេះនៅតែបន្តអភិវឌ្ឍកាន់តែស៊ីជម្រៅ និងកាន់តែរឹងមាំ ជាមិត្តភាពដែកថែប មិនអាចបំបែកបាន ប្រកបដោយភាព ស្មោះត្រង់ រួមសុខទុក្ខជាមួយគ្នា នៅគ្រប់កាលៈទេសៈទាំងអស់ ។
លោកជំទាវបានកោតសរសេរ និងវាយតម្លៃខ្ពស់ជូនចំពោះគណៈកម្មការរៀបចពិព័រណ៍ផលិងផលពាណិជ្ជកម្មកែច្នៃប្រទេសចិន ដែលបានខិតខំរៀបចំសន្និសីទផ្សព្វផ្សាយដ៏មានសារសំខាន់មួយនេះឡើង ក្នុងគោលបំណងផ្សព្វផ្សាយលម្អិតអំពីការរៀបចំពិព័រណ៍ផលិតផលពាណិជ្ជកម្មកែច្នៃប្រទេសចិន ដើម្បីផ្ដល់ជាឱកាសឱ្យវិនិយោគិនកម្ពុជាស្វែងយល់កាន់តែស៊ីជម្រៅអំពីការរៀបចំ ពិព័រណ៍នេះ ជាពិសេសអំពីបរិយាកាសវិនិយោគនិងពាណិជ្ជកម្មនៅក្នុងទីក្រុងតុងគួន ។
ក្នុងនាមក្រសួងពាណិជ្ជកម្ម លោកជំទាវស្នើឱ្យគណៈកម្មការរៀបចំពិព័រណ៍ បន្តផ្សព្វផ្សាយបន្ថែមទៀត ក្នុងគោលបំណងប្រមូលកៀគរពាណិជ្ជករ ក្រុមហ៊ុន សហគ្រាសកម្ពុជា ទៅចូលរួមឱ្យបានច្រើនថែមទៀតជាំពិសេសស្នើសុំការសហការគ្នាឱ្យកាន់តែជិតស្និទ្ធថែមទៀត ជាមួយក្រសួងពាណិជ្ជកម្មដើម្បីធ្វើយ៉ាងណាផ្សព្វផ្សាយនិងផ្ដល់ឱកាសឱ្យវិនិយោគិនពីប្រទេសទាំងពីរ សិក្សាស្វែងយល់ និងចាប់យកការបណ្ដាក់ទុនវិនិយោគទាំងក្នុងប្រទេសកម្ពុជា និងក្នុងទីក្រុងតុងគួន ក៏ដូចជាបណ្ដាតំបន់នានាក្នុងប្រទេសចិន សំដៅជំរុញទំហំពាណិជ្ជកម្មទ្វេភាគី ឱ្យច្រើនជាងមុនបន្ថែទៀត ៕
